جاڭالىقتار
«قازاقستان پرەزيدەنتتىگىنە كانديدات بولامىن دەپ شەشتىم»: دينا تولەپبەرگەن ماڭىزدى مالىمدەمە جاسادى
فوتو: https://www.instagram.com/dina_tolepbergen/
تانىمال جۋرناليست, پروديۋسەر دينا تولەپبەرگەن وزىنە قاتىستى سەگىز دەرەك ءبولىستى.
بۇل تۋرالى Stan.kz اقپارات اگەنتتىگى حابارلايدى.
باق وكىلى ءوزى تۋرالى 8 دەرەك ايتىپ, وقىرماندارىمەن سىرلاستى.
ء“يا, بويىم – 1 مەتر 53 سانتيمەتر. بىراق جۇرەگىم – XL. كامەرا ۇستاپ, شتاتيۆتەردىڭ اراسىنان وتكەن قازاق قىزدارىنىڭ جارىسى بولسا, التىن مەدال الار ەدىم. مەنىڭ نەگىزگى ماماندىعىم – رەجيسسەر. كوپتىڭ الدىندا ءسوز سويلەۋدى, ەموتسيامەن جۇمىس ىستەۋدى سول كەزدە ۇيرەندىم. ۇلىم اسقارالىگە ترومبوتسەتوپەنيا دياگنوزى قويىلعاندا كۇندىز ەفيردە شىندىق ىزدەپ, تۇندە پالاتادا ەرتەگى وقىپ وتىراتىن انا ەدىم. جۋرناليستيكادا 20 جىلدان استام تاجىريبەم بار. توني بلەر, انگەلا مەركەل, كوفي اننان سىندى الەمدىك كوشباسشىلاردان سۇحبات العان قازاق قىزىمىن. ءبىر كەزدەرى “قىز جۋرناليست بولۋ ءۇشىن اياق تا, قول دا مىقتى بولۋى كەرەك” دەگەنمىن, بىراق جۇرەك پەن جۇيكە كەرەك ەكەن. مەنى جاساعان ەكى ادام بار. انام قاتال تاربيەمەن قايرادى. كۇيەۋىم شەكسىز ماحابباتپەن وزىمە سەندىردى. 2029 جىلى قازاقستان پرەزيدەنتتىگىنە كانديدات بولامىن دەپ شەشتىم. بۇل قازاق قىزدارى ءۇشىن”, – دەپ جازدى جۋرناليست.
ەسكە سالايىق, دينا تولەپبەرگەن 20 جىل بۇرىن تۇرعان ءۇيىن كورسەتكەن ەدى.
“20 جىلدان سوڭ ورالۋ… شىمكەنت, 1 بولمەلى سۋىق پاتەر… كىشكەنتاي كەزىمدە دوستارىما پاتەرىمدى, ءۇيىمدى كورسەتۋگە قىنجىلاتىنمىن. سەبەبى تۇرمىستىڭ تومەندىگىن كورىپ, ۇيالىپ, ارالاساتىندار الشاقتايدى دەگەن قورقىنىش بولعان ەدى. مەكتەپ كەزىمدە وسى ۇيىمە جاقىن قۇربىم كەلدى. ول نە ايتادى, ءۇي-جاعدايىمدى كورىپ قاشقاقتاي ما, دەگەن وي بولعانى جاسىرىن ەمەس”, – دەگەن ەدى باق وكىلى.
