جاڭالىقتار
قازاقستان راديكالدارمەن كۇرەستە نۇرلان يمامدى پايدالانباق
فوتو:Caravan.kz
قازاقستان راديكالدارمەن كۇرەستە نۇرلان يمامدى پايدالانباق, دەپ جازدى qandastar.kz
تيك-توك پەن ينستاگرامدى جاۋلاپ العان راديكالدى يسلام يدەولوگياسىنا قارسى كۇرەستە نۇرلان يمام سياقتى تانىمال ءداستۇرلى ۋاعىزشىلاردى پايدالانۋ جوسپارلانىپ وتىر. دومبىرا مەن ناۋرىزدى حارام دەۋ, قازاقستان تۋىنا اراب قىلىشىن قويىپ نيكابپەن فوتوعا ءتۇسۋ سياقتى ارەكەتتەردىڭ كوبەيۋى بيلىكتى ويلاندىرىپ تاستادى.
«جاقىن ارادا سالافيزم, ۆاحابيزم يدەولوگياسىمەن اقپاراتتىق كەڭىستىكتە كۇرەسۋ بويىنشا ارنايى شتاب قۇرىلۋى مۇمكىن. وعان مىقتى يدەولوگتار, پسيحولوگتار, PR ماماندارى, جۋرناليستەر مەن ينتەرنەتتە تانىمال تۇلعالار تارتىلۋى ءتيىس. ءوزارا بۇل شتابقا «انتي پرونتو» دەگەن كودتىق اتاۋ قويىلدى», — دەيدى, DALA INSIDE دەرەككوزى.
dalainsidە حابارلاعانداي, قازىردەن باستاپ نۇرلان يمام مەشىت ەمەس, مەكتەپتىڭ كوبىرەك قاجەتتىگىن, قازاقتىڭ سالت-داستۇرلەرى مەن ىرىمدارىنىڭ حارام ەمەستىگىن كەڭىنەن ايتا باستادى. بىراق جالعىز يمامنىڭ كۇشى جەتكىلىكسىز. سوندىقتان شتاب قاجەت دەپ تاپسا, وندا بۇل وپەراتسياعا «ماڭگىلىك ەل» بوتوفەرماسى تارتىلۋى مۇمكىن. ەلىمىزدەگى ءنومىرى ەكىنشى بوتوفەرما حالىقارالىق پرونتو-مەن كادىمگىدەي كۇرەسە الادى. بيلىك ءدىني ماسەلەنى بيىل رەتتەپ تاستاپ, قازاقتاردى ءبىر يدەولوگيا اياسىندا جۇمىلدىرۋعا نيەتتى. سەبەبى پرەزيدەنتتىك سايلاۋ جاقىنداپ كەلەدى. وسى كەزدە سىرتقى كۇشتەر قازاقتىلدى ەلەكتوراتتى ءدىني كوزقاراسى بويىنشا ءبولىپ جىبەرىپ, ءوز ماقساتىنا پايدالانىپ كەتۋى عاجاپ ەمەس.
«شتاب قۇرىلاتىن بولسا, ەلدە مەشىت سالا بەرۋدى توقتاتۋ ماسەلەسى كوتەرىلەتىن بولادى. ساۋاپ جيناعىسى كەلگەن بيزنەسمەندەرگە قمدب يمامدارى مەكتەپ پەن بالاباقشا سالىنسا, ساۋاپتىڭ كوبىرەك تۇسەتىنىن تۇسىندىرەدى دەپ ويلاستىرىلعان. قازىر ونىڭ قۇران مەن حاديستەردەگى تەولوگيالىق دالەلى پىسىقتالىپ جاتىر», — دەيدى دەرەككوز.
بيىلدان باستاپ الەۋمەتتىك جەلىلەردە ءدىني تالاس پەن تارتىستىڭ كۇشەيگەنى بايقالادى. ءبارىن حارام دەپ جاتقان يسلاميستەرگە جاۋاپ رەتىندە ۇلتجاندى قازاق جاستارى مۇسىلماندىقتان شىعىپ, وزدەرىن اگنوستيك نەمەسە «تاڭىرگە ورالدىق» دەپ جاريالاۋدا. بيلىك ءۇشىن وسى ماسەلەنى ۋشىقتىرماي تەزىرەك رەتتەۋ قاجەتتىلىگى تۋىندادى. https://t.me/dalainsidە
