«قازاقستان سپورتى پاريجدە كۇيرەيدى»: شەتەلدىك باسىلىمنىڭ بولجامى ورىندالمادى

فوتو: olympic.kz

پاريج وليمپياداسىنىڭ الدىندا «Sports Illustrated» جۋرنالى قازاقستان سپورتشىلارى ساتسىزدىككە ۇشىرايدى دەگەن بولجامىن جازعان بولاتىن. ياعني, تورتجىلدىقتىڭ باستى ويىندارى قازاقستاندىق كوماندا ءۇشىن «التىنسىز» اياقتالادى دەگەن ەدى.

ارتىنشا, «Inside the games» باسىلىمى دا وسى ويدى جەتىلدىرىپ, ورتا ازيا ەلدەرىنىڭ سپورتى پاريج وليمپياداسى قارساڭىندا توقىرايدى دەگەن ماقالا جازدى.

جۋرنالدا جاريالانعان ماقالادا قازاقستان كومانداسى باس-اياعى التى مەدال الاتىنىن, ونىڭ بىرەۋى عانا كۇمىس, قالعان بەسەۋى قولا بولاتىنىن مالىمدەگەن ەدى. ال, insidethegames.biz سايتىندا جاريالانعان تالداۋ ماتەريالىندا توكيوداعى ساتسىزدىك پاريجدە قايتالانادى دەلىنگەن.

الايدا, ۋاقىت كورسەتكەندەي, قوس باسىلىمنىڭ دا بولجامى كەلمەدى. وليمپيادانىڭ العاشقى ەكى كۇنىندە قازاقستان كومانداسى 1 التىن جانە 2 قولا مەدال ەنشىلەپ ۇلگەردى. اتاپ ايتقاندا, دزيۋدوشى ەلدوس سمەتوۆ 60 كەلىدە چەمپيون بولسا, ونىڭ ارىپتەسى عۇسمان قىرعىزباەۆ قولا جۇلدەگە قول جەتكىزگەن. سونىمەن قاتار, پنەۆماتيكالىق ۆينتوۆكامەن 10 مەتردەن نىسانا كوزدەۋدەن قازاقستان-1 كومانداسى دا ءۇشىنشى ورىنعا تۇراقتادى.

الداعى ۋاقىتتا ەركىن كۇرەس پەن گرەك-ريم كۇرەسىنىڭ بالۋاندارى, سونىمەن قاتار بوكسشىلار قازاقستان قورجىنىنا تاعى بىرنەشە جۇلدە سالادى دەپ كۇتىلۋدە. ونىڭ قانشاۋى التىن, كۇمىس جانە قولا بولاتىنىن ۋاقىت كورسەتەدى.