جاڭالىقتار
قازاقستان سۋارۋ كەزەڭىندە سىرداريا وزەنى ارقىلى شامامەن 3,7 ملرد تەكشە مەتر سۋ الادى
فوتو: اشىق دەرەككوز
قازاقستان بيىل سۋارۋ كەزەڭىندە سىرداريا وزەنى ارقىلى شامامەن 3,7 ملرد تەكشە مەتر سۋ الادى, دەپ جازدى qandastar.kz
سۋ رەسۋرستارى ءمينيسترى نۇرجان نۇرجىگىتوۆ وزبەكستان, تاجىكستان جانە تۇرىكمەنستان مەملەكەتتەرىندەگى ارىپتەستەرىمەن وسى جونىندە كەلىسىمگە كەلدى. سامارقاندتا ورتالىق ازيانىڭ مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ 89-شى وتىرىسى ءوتتى. ال, «دوستىق» مەملەكەتارالىق كانالىمەن سۋارۋ كەزەڭىندە قازاقستانعا 909 ملن تەكشە مەتر سۋ كەلەدى. سولتۇستىك ارالعا 975 ملن تەكشە مەتر سۋ جىبەرۋ جوسپارلانىپ وتىر.
«قازىر ءبىز تاسقىن سۋدى وزەن-كولدەرگە باعىتتاپ, ونى سۋ قويمالارىنا جيناپ جاتىرمىز. الايدا, وڭتۇستىك ايماقتارعا كەلەتىن بولساق, سۋ ديپلوماتياسى وتە ماڭىزدى. جازعى سۋارۋ كەزەڭىنە دايىندىق اياسىندا ءبىز بىلتىردان كەلىسسوز جۇرگىزدىك. سىرداريا وزەنى ارقىلى قازاقستانعا كەلەتىن سۋ شاردارا قويماسىنان جينالىپ, وڭتۇستىك وبلىستاردىڭ شارۋالارىن قامتاماسىز ەتۋ ءۇشىن پايدالانىلادى», — دەدى مينيستر نۇرجان نۇرجىگىتوۆ.
