جاڭالىقتار
قازاقستان سۇيىتىلعان گاز بەن بولات دايىندامالارىن ەكسپورتتاۋعا تىيىمدى ۇزارتتى
فوتو: Zakon.kz
قازاقستاندا سۇيىتىلعان گاز بەن بولات دايىندامالارىن سىرتقا شىعارۋعا قويىلعان تىيىم ۇزارتىلدى. اقپارات ۇكىمەتتە وتكەن سىرتقى ساۋدا ساياساتى جانە حالىقارالىق ەكونوميكالىق ۇيىمدارعا قاتىسۋ ماسەلەلەرى جونىندەگى ۆەدومستۆوارالىق كوميسسيا وتىرىسىنان كەيىن بەلگىلى بولدى, دەپ حابارلايدى qandastar.kz Zakon.kz-كە سىلتەمە جاساپ.
ساۋدا جانە ينتەگراتسيا مينيسترلىگىنىڭ ءباسپاسوز قىزمەتى مالىمدەگەندەي, بۇعان دەيىن سۇيىتىلعان مۇناي گازىن شەكارالاس ەلدەرگە اكەتۋدىڭ الدىن الۋ جانە ىشكى نارىقتا تاپشىلىقتى بولدىرماۋ ماقساتىندا ەكسپورتقا تىيىم سالىنعان بولاتىن.
سونىمەن قاتار, بولات دايىندامالارى مەن جارتىلاي فابريكاتتارىن سىرتقا شىعارۋعا قويىلعان تىيىم تاعى التى ايعا ۇزارتىلدى. ساۋدا مينيسترلىگى مۇنىڭ وڭ ناتيجەسى رەتىندە مەتاللۋرگيا ونەركاسىبىندە تەرەڭ وڭدەۋگە بەت بۇرۋدى جانە ارماتۋرا ەكسپورتىنىڭ 30 مىڭ تونناعا جۋىق وسكەنىن اتاپ ءوتتى.
بۇدان بولەك, ەاەو-عا كىرمەيتىن ەلدەردەن قازاقستانعا گيپسوكارتون مەن تاس ونىمدەرىن اكەلۋگە ءۇش ايعا تىيىم سالۋ ۇسىنىسى قولداۋ تاپتى.
«2024 جىلى قازاقستاندا 95,2 مىڭ توننا برۋسچاتكا ءوندىرىلدى, ال ىشكى سۇرانىس 58,76 مىڭ توننانى قۇرادى. گيپسوكارتون ءوندىرىسى 35,5 ملن شارشى مەتر بولدى, ال ەل ىشىندەگى سۇرانىس 38,8 ملن شارشى مەتردى قۇرادى. قازاقستاندىق كاسىپورىنداردىڭ وندىرىستىك قۋاتى – 46 ملن شارشى مەتر. وتاندىق گيپسوكارتون جانە تاس بۇيىمدارىن وندىرۋشىلەر وسى ونىمدەردىڭ باعاسىن ساقتاۋعا مىندەتتەمە الدى», — دەپ ءتۇسىندىردى مينيسترلىك.
سونىمەن بىرگە, قىتايدان اكەلىنەتىن ىستىقتاي دەفورماتسيالانعان تىگىسسىز قۇبىرلارعا جانە قىتاي مەن ۋكراينادان جەتكىزىلەتىن مىرىشتالعان پروكاتقا قاتىستى دەمپينگكە قارسى شارالار ۇزارتىلاتىن بولدى.
قازاقستاننان فانەرا ەكسپورتىن اۆتوماتتى ليتسەنزيالاۋ ەنگىزىلەتىنى دە ماقۇلداندى. بۇل ىشكى فانەرا ونىمدەرىنىڭ ەكسپورت اعىندارىن تالداۋعا مۇمكىندىك بەرەدى.
