جاڭالىقتار
قازاقستان ۇكىمەتى ينۆەستورلار ءۇشىن قولايلى جاعداي تۋعىزۋدا
قازاقستان پرەمەر-ءمينيسترى ولجاس بەكتەنوۆ بارلىق ينۆەستورلارعا ۇندەۋ جولدادى. ول ءوز مالىمدەمەسىن ۇكىمەت وتىرىسىندا ايتتى.
«بۇگىندە الەمنىڭ كوپتەگەن ەلدەرى ينۆەستيتسيا تارتۋعا بارىنشا ءمان بەرىپ وتىر. قازاقستاننىڭ دا ماقساتى – سول! ءبىز وتاندىق جانە شەتەلدىك بيزنەسپەن ءوزارا ءتيىمدى ىنتىماقتاستىق ورناتۋعا مۇددەلىمىز. ءبىز ۇزاق مەرزىمدى ينۆەستيتسيالار ءۇشىن بارىنشا قولايلى جاعداي جاساۋعا ۇدايى ۇمتىلىپ كەلەمىز.
قازاقستان ۇكىمەتى جوعارى دەڭگەيدە وڭدەلگەن ونىمدەر شىعارۋعا, اقپاراتتىق تەحنولوگيالاردى وزىق قارقىنمەن دامىتۋعا, ەلىمىزدىڭ سەرپىندى دامۋىنا ىقپال ەتەتىن يننوۆاتسيالىق كاسىپورىندار قۇرۋعا باعىتتالعان ءاربىر ءىرى ينۆەستيتسيالىق جوباعا قولداۋ كورسەتۋگە كەپىلدىك بەرەدى دەپ سەندىرگىم كەلەدى.
ۇكىمەت ينۆەستورلارعا رەسۋرستارعا كەدەرگىسىز قول جەتكىزۋگە مۇمكىندىك جاسايدى, ينفراقۇرىلىمدىق جانە كونسۋلتاتيۆتىك قولداۋ كورسەتەدى, ونىمدەرىن وتكىزۋگە كومەكتەسەدى.
سىزدەر مەملەكەتتىك جانە قۇقىق قورعاۋ ورگاندارى تاراپىنان ەشقانداي قىسىم كورمەيسىزدەر. وعان ەشقانداي كۇمان بولماسىن.
كەرىسىنشە, ۇكىمەت سىزدەرگە سەنىمدى ءارى اشىق ارىپتەس بولادى.
بۇل ماسەلەلەردى شەشۋ ءۇشىن ينۆەستيتسيالىق شتاب جۇمىس ىستەيدى.
وتكەن جىلدىڭ سوڭىندا پرەزيدەنت قاسىم-جومارت توقاەۆ اتالعان شتابقا ەرەكشە وكىلەتتىكتەر بەردى.
ءبىز وتاندىق جانە شەتەلدىك ينۆەستيتسيالار اعىنىن ارتتىرۋ ءۇشىن باسقا دا باستامالاردى ىسكە اسىرۋعا نيەتتىمىز.
ولاردىڭ قاتارىندا ەكونوميكانىڭ باسىم سالالارىندا ينۆەستورلار ءۇشىن تۇبەگەيلى ىنتالاندىرۋ شارالارى مەن جاڭا تاسىلدەردى قولدانۋ, سالىقتىق پرەفەرەنتسيالار, بيۋروكراتيانى جانە بيزنەسكە قاجەتسىز تالاپتاردى الىپ تاستاۋ كوزدەلۋدە.
كۇش-جىگەرىمىزدى جۇمىلدىرا وتىرىپ, ءبىز قازاقستان ەكونوميكاسىن دامىتۋدا ەلەۋلى تابىستارعا قول جەتكىزەمىز جانە ءوزارا ءتيىمدى ىنتىماقتاستىقتى قامتاماسىز ەتەمىز دەپ سەنەمىن», — دەدى ولجاس بەكتەنوۆ.
