جاڭالىقتار
قازاقستان جەنەۆادا قارۋسىزدانۋ جونىندەگى كونفەرەنتسياعا قاتىستى
قازاقستان الەمدە بەيبىتشىلىكتى نىعايتۋ بويىنشا تىڭ ۇسىنىستار جاسادى. ولاردى پرەمەر-ءمينيستردىڭ ورىنباسارى — سىرتقى ىستەر ءمينيسترى مۇرات نۇرتىلەۋ جەنەۆادا وتكەن قارۋسىزدانۋ جونىندەگى كونفەرەنتسيادا جاريالادى. كەزدەسۋدە پرەزيدەنت قاسىم-جومارت توقاەۆتىڭ بيوقاۋىپسىزدىك بويىنشا حالىقارالىق اگەنتتىك قۇرۋ باستاماسى اتاپ ءوتىلدى. الەمدەگى قازىرگى گەوساياسي جاعداي بيولوگيالىق قارۋدىڭ تىيىم سالىنعانىنا جانە ەشقاشان قولدانىلمايتىنىنا كەپىلدىك بەرۋدى قاجەت ەتەدى.
سونداي-اق قازاقستاننىڭ يادرولىق قارۋسىز الەم قۇرۋ جولىندا ءتۇرلى ءىس-شارالاردى بەلسەندى وتكىزىپ كەلە جاتقانى ايتىلدى.
ەلىمىز قارۋسىزدانۋ بويىنشا 2 ماڭىزدى فورۋمعا جەتەكشىلىك ەتەدى جانە يادرولىق قارۋدان ازات اۋماقتار تۋرالى كونفەرەنتسيا وتكىزەدى. مۇرات نۇرتىلەۋ, قر پرەمەر-ءمينيسترىنىڭ ورىنباسارى – سىرتقى ىستەر ءمينيسترى: «بىرىككەن ۇلتتار ۇيىمىنىڭ قۇرامىنا كىرەتىن ەلدەردىڭ ۇشتەن ەكىسى يادرولىق قارۋدان ازات اۋماقتار قۇرۋعا اتسالىسىپ جاتىر. الداعى تامىز ايىندا ءبىز قازىرگى بار 5 اۋماق وكىلدەرىنىڭ ەكىنشى كەزدەسۋىن وتكىزەمىز.» مينيستر سونداي-اق بۇۇ-نىڭ جەنەۆاداعى وكىلدىگىنىڭ باس ديرەكتورى تاتيانا ۆالوۆايامەن جانە حالىقارالىق ەڭبەك ۇيىمىنىڭ باس ديرەكتورى جيلبەر ۋنگبومەن كەزدەستى.
باسقوسۋدا قازاقستاننىڭ بەيبىتشىلىك بويىنشا ىنتىماقتاستىقتى نىعايتۋعا ءازىر ەكەنىن جەتكىزدى. ال جيلبەر ۋنگبو ەلىمىزدىڭ ەڭبەك قاتىناسى سالاسىنداعى رەفورمالارعا قىزىعۋشىلىق تانىتىپ, قازاقستانداعى ءىس-شارالاردى جوعارى باعالادى. بۇدان بولەك قازاق ديپلوماتى پالەستينا, ماروككو, ەستونيا, نيدەرلاند جانە چەرنوگوريانىڭ سىرتقى ىستەر مينيسترلەرىمەن ەكى جاقتى كەلىسسوزدەر جۇرگىزدى.
