قازاقستان جەنەۆاداعى ەڭبەك كونفەرەنتسياسىنا قاتىسىپ جاتىر

ساراپشىلار, ساياساتكەرلەر مەن كاسىپوداق جەتەكشىلەرىنىڭ باسىن قوسقان حالىقارالىق ءىس-شاراعا قازاقستان وكىلدەرى دە قاتىستى,-دەپ حابارلايدى Qandastar.kz

حالىقارالىق ەڭبەك ۇيىمى جىل سايىن كونفەرەنتسيا وتكىزەدى. بىراق ساراپشىلار: «بيىلعىسىنىڭ ءمانى زور», – دەيدى. ويتكەنى پاندەميادان كەيىن بۇكىل الەمدە ءوندىرىس قايتا جانداندى. بۇل ءۇردىس جىلدام ءجۇرىپ, كوپ جاعدايدا جۇمىسشىلاردىڭ قۇقىعى بۇزىلىپ جاتىر. حالىقارالىق جيىندا ءبىزدىڭ دەلەگاتسيا كوپشىلىككە ءوز بايانداماسىن تانىستىردى. وندا قازاقستاندا لايىقتى ەڭبەك جۇيەسىن قۇرۋ بويىنشا بەلسەندى جۇمىستار جۇرگىزىلىپ جاتقانى تۋرالى ايتىلدى.

اقمادي سارباسوۆ, قر ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى: – كونفەرەنتسيا كەزىندە قازاقستاندا ىسكە اسىرىلىپ جاتقان ەڭبەك جانە الەۋمەتتىك ساياسات جۇيەسى ايتارلىقتاي ءتيىمدى ەكەنى ايتىلىپ جاتىر.

ول 4 ميلليون تۇرعىندى الەۋمەتتىك جاعىنان قورعاۋعا مۇمكىندىك بەرەدى. سونداي-اق 7 ميلليونعا جۋىق جالدامالى جۇمىسشى قۇقىعىنىڭ بۇزىلماۋىن قامتاماسىز ەتەدى. ەلىمىزدە جاڭا الەۋمەتتىك كودەكس قابىلدانعان. وندا حالىقارالىق تاجىريبە مەن ستاندارتتاردىڭ بارلىعى ەسكەرىلگەن. رەفورمالار پاكەتى ەڭبەك قاۋىپسىزدىگىن ارتتىرۋعا باعىتتالعان. شاحتەرلەردىڭ دەنساۋلىعىن قورعايتىن كونۆەنتسياعا قوسىلۋ مۇمكىندىگى دە قاراستىرىلىپ جاتىر.

بۇدان بولەك, مەملەكەت كاسىپوداقتار جانە جۇمىس بەرۋشىلەرمەن ىنتىماقتاستىقتى نىعايتتى. جۇمابەك جانىقۇلوۆ, «Paryz» جۇمىس بەرۋشىلەر كونفەدەراتسياسى پرەزيديۋمىنىڭ توراعاسى: – شاعىن جانە ورتا بيزنەستىڭ جۇمىس ستاندارتىن دا جوعارلاتۋىمىز كەرەك. سوعان بايلانىستى ءبىز كوپتەگەن مەملەكەتپەن بىرگە زاڭنامالارىن وزگەرتۋىمىز كەرەك.

سونىمەن قاتار ءبىزدىڭ شاعىن جانە ورتا كاسىپ جۇمىس بەرۋشىلەرى, بيزنەس وكىلدەرىنىڭ دە بولىپ جاتقان جاڭا ترەندتەرگە قاتىسۋ ءۇشىن ولاردىڭ بەلسەندىلىگى قاجەت. سوندىقتان ءبىز كاسىپوداق رەتىندە وسىنداي ۇلكەن جيىندارعا قاتىسىپ, جاڭا ترەندتەردى ەنگىزۋ جولىندا كەلىپ تۇرمىز. كونفەرەنتسيانىڭ باستى تاقىرىبىنىڭ ءبىرى – الەۋمەتتىك ادىلەتتىلىك ماسەلەسى. بۇرىندارى بۇل باعىتقا بولىنەتىن اقشا اقتالمايدى دەپ سانالسا, قازىر ەكونوميستەر لايىقتى ەڭبەكاقى قىزمەتكەرگە عانا ەمەس, جۇمىس بەرۋشىگە دە, كەرەك دەسەڭىز, بۇكىل قوعامعا ءتيىمدى ەكەنىن ايتادى. دجاياتي گوش, ەكونوميست: – كوپ ەلدە جىلدار بويى ەكونوميكالىق ساياسات ينۆەستيتسيا تارتىپ, نارىقتى ىرىقتاندىرۋعا باعىتتالىپ كەلگەنىن كورىپ وتىرمىز. سودان قازىر الەۋمەتتىك ادىلەتتىلىك پەن ەڭبەك شارتتارىن جاقسارتۋ ەكىنشى ورىنعا ىعىستىرىلعان.

كەيىنگى كەزدەرى ەكونوميكالىق تەڭسىزدىكتىڭ ارتىپ بارا جاتقانىن, سونداي-اق قارجىلاي تۇراقسىزدىقتى دا جوققا شىعارا المايمىز. مۇنىڭ ءبارى الەۋمەتتىك-ساياسي الشاقتىقتىڭ پايدا بولۋىنا اكەپ سوقتىرادى.

حالىقارالىق ءىس-شارا قاتىسۋشىلارى دامۋدىڭ باستى تالابى الەۋمەتتىك ادىلەتتىلىك ەكەنىن مويىنداپ وتىر. وسى رەتتە كونفەرەنتسيا سوڭىندا الەۋمەتتىك ادىلەتتىلىكتى قولدايتىن جاھاندىق كواليتسيانىڭ العاشقى فورۋمى وتەدى. ونىڭ قۇرامىنا 70-تەن اسا مەملەكەت كىرەدى. ىشىندە قازاقستان دا بار.