جاڭالىقتار
قازاقستاندا 12 سۋديا قىزمەتىنەن شەتتەتىلەدى
2025 جىلعى 5 قاڭتاردا جاريالانعان رەليزگە سايكەس, كەڭەس 12 سۋديانى قىزمەتىنەن بوساتۋعا ۇسىنىس جاسادى, ونىڭ ىشىندە:
- 3 – وتستاۆكاعا كەتۋىنە بايلانىستى;
- 5 – ءوز قالاۋى بويىنشا;
- 1 – سوت ۇكىمىنىڭ زاڭدى كۇشىنە ەنۋىنە بايلانىستى;
- 3 – تارتىپتىك تەرىس قىلىق جاساعانى ءۇشىن سوت ءجيۋريىنىڭ شەشىمى بويىنشا
سونداي-اق وتىرىس بارىسىندا جوعارعى سوت كەڭەسى اۋداندىق جانە وعان تەڭەستىرىلگەن سوتتاردىڭ سۋديالارىنىڭ 207 بوس لاۋازىمىنا ورنالاسۋعا جاريالانعان كونكۋرستىڭ قورىتىندىسىن شىعاردى, وعان 237 كانديدات ءوتىنىش بەردى.
«اۋداندىق جانە وعان تەڭەستىرىلگەن سوتتاردىڭ سۋدياسى لاۋازىمدارىنا ۇسىنىمدار 126 ادامنان ءتۇستى, ونىڭ ىشىندە 98-ءى – العاش رەت ۇسىنىلعان زاڭگەرلەر, 28-ءى – قازىرگى سۋديالار. سۋديا لاۋازىمدارىنا تاعايىنداۋعا ۇسىنىلعان كانديداتتار تۋرالى اقپارات كەڭەس وتىرىسىنىڭ ونلاين-ترانسلياتسياسىندا جاريالاندى».قر جوعارعى سوت كەڭەسىنىڭ ءباسپاسوز قىزمەتى
ۇسىنىستار العان تۇلعالار تۋرالى تولىق اقپارات كەڭەستىڭ رەسمي سايتىندا ورنالاستىرىلعان. اۋداندىق جانە وعان تەڭەستىرىلگەن سوتتاردىڭ توراعاسى, وبلىستىق جانە وعان تەڭەستىرىلگەن سوتتاردىڭ توراعالارى, سوت القالارىنىڭ توراعالارى مەن سۋديالارى, قازاقستان رەسپۋبليكاسى جوعارعى سوتىنىڭ سۋديالارى مەن سوت القالارىنىڭ توراعالارى لاۋازىمدارىنا 91 سۋديا كادر رەزەرۆىنە ەنگىزىلدى.
