قازاقستاندا 1500-گە جۋىق بالالار فۋتبول الاڭى سالىنادى

تۋريزم جانە سپورت مينيسترلىگى مەن «قازاقستان حالقىنا» قوعامدىق قورى ءوزارا ىنتىماقتاستىق تۋرالى مەموراندۋمعا قول قويدى, دەپ حابارلادى Qandastar.kz سايتى تۋريزم جانە سپورت مينيسترلىگىنە سىلتەمە جاساپ.

جالپى اتالعان قور بۇگىنگە دەيىن دەنە شىنىقتىرۋ جانە سپورت سالاسىندا جالپى سوماسى 12,5 ميلليارد تەڭگەنى قۇرايتىن 16 قايىرىمدىلىق باعدارلاما مەن جوبانى جۇزەگە اسىردى.

«قور نەگىزىنەن اۋىلدىق جەرلەرگە باسا نازار اۋدارىپ كەلەدى. جۇيەلى باستامالار قاتارىندا ەلىمىزدىڭ 12 وڭىرىندە انگار ۇلگىسىندە جىل بويى جۇمىس ىستەيتىن 23 ءمودۋلدى سپورت زالىنىڭ قۇرىلىسى بار. قازىرگى تاڭدا ولاردىڭ 10-ى پايدالانۋعا بەرىلدى. سونىمەن قاتار «باتىر بولامىن» قورىمەن بىرلەسىپ جۇزەگە اسىرىلىپ جاتقان «100 اۋىلدىق سپورت زالى» جوباسى 25 مىڭنان استام بالا مەن ءجاسوسپىرىمدى قامتىدى. جىل سوڭىنا دەيىن تاعى 100 سپورت زالىنىڭ اشىلۋى جوسپارلانىپ وتىر», — دەپ جازىلعان حابارلامادا.

جالپى رەسپۋبليكا بويىنشا 90 جابىق سپورت نىسانىنىڭ قۇرىلىسى اياقتالعان. سونىڭ 61-ءى اۋىلدىق جەرلەردە ورنالاسقان.

مينيسترلىك مالامەتىنشە, الداعى ەكى جىلدا ەلىمىزدىڭ ءاربىر اۋدانى مەن اۋىلىندا بالالارعا ارنالعان فۋتبول الاڭدارى سالىنۋعا ءتيىس. قازىرگى تاڭدا مينيسترلىك وسى باعىتتاعى ءىس-شارالار جوسپارىن ازىرلەپ جاتىر. ال جەرگىلىكتى اتقارۋشى ورگانداردىڭ مالىمەتى بويىنشا, بۇگىندە قازاقستاندا 6 926 بالالار فۋتبول الاڭى جۇمىس ىستەپ تۇر. بۇعان قوسىمشا تاعى 1 489 الاڭ سالۋ قاجەت.

مەموراندۋمنىڭ قولدانىس مەرزىمى 2030 جىلعى 31 جەلتوقسانعا دەيىن بەلگىلەنگەن.