Qazaqstanda 1500-ge jýyq balalar fýtbol alańy salynady

Týrızm jáne sport mınıstrligi men «Qazaqstan halqyna» qoǵamdyq qory ózara yntymaqtastyq týraly memorandýmǵa qol qoıdy, dep habarlady Qandastar.kz saıty týrızm jáne sport mınıstrligine silteme jasap.

Jalpy atalǵan qor búginge deıin dene shynyqtyrý jáne sport salasynda jalpy somasy 12,5 mıllıard teńgeni quraıtyn 16 qaıyrymdylyq baǵdarlama men jobany júzege asyrdy.

«Qor negizinen aýyldyq jerlerge basa nazar aýdaryp keledi. Júıeli bastamalar qatarynda elimizdiń 12 óńirinde angar úlgisinde jyl boıy jumys isteıtin 23 modýldi sport zalynyń qurylysy bar. Qazirgi tańda olardyń 10-y paıdalanýǵa berildi. Sonymen qatar «Batyr bolamyn» qorymen birlesip júzege asyrylyp jatqan «100 aýyldyq sport zaly» jobasy 25 myńnan astam bala men jasóspirimdi qamtydy. Jyl sońyna deıin taǵy 100 sport zalynyń ashylýy josparlanyp otyr», — dep jazylǵan habarlamada.

Jalpy respýblıka boıynsha 90 jabyq sport nysanynyń qurylysy aıaqtalǵan. Sonyń 61-i aýyldyq jerlerde ornalasqan.

Mınıstrlik málámetinshe, aldaǵy eki jylda elimizdiń árbir aýdany men aýylynda balalarǵa arnalǵan fýtbol alańdary salynýǵa tıis. Qazirgi tańda mınıstrlik osy baǵyttaǵy is-sharalar josparyn ázirlep jatyr. Al jergilikti atqarýshy organdardyń málimeti boıynsha, búginde Qazaqstanda 6 926 balalar fýtbol alańy jumys istep tur. Buǵan qosymsha taǵy 1 489 alań salý qajet.

Memorandýmnyń qoldanys merzimi 2030 jylǵy 31 jeltoqsanǵa deıin belgilengen.