جاڭالىقتار
قازاقستاندا 18-گە تولماعان 75 بالا تۇرمەدە جازاسىن وتەپ جاتىر – ءىىم
ەلىمىزدە قازىرگى ۋاقىتتا كامەلەتكە تولماعانداردى ۇستاۋ ورىندارىندا 75 بالا جازاسىن وتەپ جاتىر, دەپ حابارلايدى Qandastar.kz اقپارات پورتالى.
ءماجىلىس دەپۋتاتى داۋلەت مۇقاەۆ ىشكى ىستەر جانە وقۋ-اعارتۋ مينيسترلىكتەرىنىڭ وكىلدەرىنە قىلمىستىق قۇقىق بۇزۋشىلىق جاساعان 18 جاسقا تولماعان كامەلەتكە تولماعاندار تۋرالى زاڭ جوباسىنداعى ماڭىزدى ماسەلەلەر بويىنشا سۇراقتار قويدى.
زاڭ جوباسى بويىنشا 18 جاسقا تولماعان بالالار قىلمىستىق جاۋاپتىلىقتان بوساتىلىپ, ولار اتا-انالارىنا نەمەسە بالالاردى الماستىراتىن مەكەمەلەرگە قايتارىلادى.
داۋلەت مۇقاەۆ قىلمىستىق-اتقارۋ جۇيەسىندە قازىر قانشا كامەلەتكە تولماعان سوتتالۋشى بار جانە ولاردىڭ قانشاسى وسى راقىمشىلىققا ىلىنەتىنى جونىندە ناقتى اقپارات سۇرادى.
ىشكى ىستەر ءمينيسترىنىڭ ورىنباسارى اباي قايىربەكوۆ قازىرگى تاڭدا 75 كامەلەتكە تولماعان سوتتالۋشىنىڭ جازاسىن وتەپ جاتقانىن مالىمدەدى.
قازىرگى ۋاقىتتا كامەلەتكە تولماعانداردى ۇستاۋ ورىندارىندا 75 بالا جازاسىن وتەپ جاتىر. ونىڭ 70-ءى ۇل, الماتى قالاسىنداعى №11 مەكەمەدە, ال 5 قىز الماتى وبلىسى جاۋعاشتى كەنتىندەگى مەكەمەدە جازاسىن وتەپ جاتىر. وسى سوتتالعانداردىڭ ىشىندە 4 ءجاسوسپىرىم راقىمشىلىققا ىلىگەدى, (جازا) مەرزىمى قىسقارتىلادى. سونداي-اق قازىرگى ۋاقىتتا قىلمىستىق اتقارۋ جۇيەسى مەكەمەلەرىندە بۇرىن وسى راقىمشىلىققا ىلىگىپ, قايتا قىلمىس جاساعانداردى سانى 2 مىڭنان اسادى. ولاردى دا ءبىز ىرىكتەپ قارادىق. ونىڭ ىشىندە راقىمشىلاققا ىلىگەتىن 30-دان استام ادام بار, — دەپ ءتۇسىندىردى ءىىم وكىلى.
وقۋ-اعارتۋ ۆيتسە-ءمينيسترى ەدىل وسپان زاڭ جوباسىندا «مامانداندىرىلعان مەملەكەتتىك ورگان» دەگەن ۇعىم بالالاردى, اسىرەسە جەتىمدەر مەن اتا-اناسىنىڭ قامقورلىعىنسىز قالعان بالالارعا ارنالعان مەكەمەلەر دەپ ناقتىلانعانىن اتاپ ءوتتى. بۇل مەكەمەلەر جەرگىلىكتى اتقارۋشى ورگانداردىڭ قولداۋىمەن بالالاردىڭ ءبىلىم الۋىنا, كاسىپتىك-تەحنيكالىق وقۋعا تۇسۋىنە, سونداي-اق جاتاقحاناعا ورنالاستىرۋ ماسەلەلەرىن شەشۋگە مۇمكىندىك بەرەدى.
