جاڭالىقتار
قازاقستان 2030 جىلعا دەيىن 103 ۇشاق ساتىپ الماق
2030 جىلعا دەيىن قازاقستاننىڭ اۋە كەمەلەرى پاركى تاعى 103 ۇشاقپەن تولىقتىرىلادى. بۇل تۋرالى Qandastar.kz ۇكىمەتتىڭ رەسمي سايتىنا سىلتەمە جاساپ حابارلايدى.
ۇكىمەت مالىمەتىنشە, بۇگىنگى تاڭدا ەلىمىزدەگى اۋە كەمەلەرى پاركىندە 104 ۇشاق بار, ونىڭ ىشىندە 2025 جىلدىڭ ءبىرىنشى جارتىجىلدىعىندا جەتكىزىلگەن 6 جاڭا Airbus A320 ءتيپتى ۇشاعى مەن 1 جاڭا Boeing 737 MAX 8 ۇشاعى بار. 2030 جىلعا دەيىن تەحنيكالىق پارك تاعى 103 ۇشاقپەن تولىقتىرىلادى.
«بيىل 36 جاڭا حالىقارالىق مارشرۋت اشىلىپ, نارىققا 8 شەتەلدىك اۆياكومپانيا كەلدى. ەل ىشىندە 61 باعىت بويىنشا اپتاسىنا 850 رەيس جاسالادى», – دەپ اتاپ ءوتتى كولىك ۆيتسە-ءمينيسترى ماقسات قالياقپاروۆ.
سونداي-اق ەلىمىزدە كولىك قولجەتىمدىلىگىن قامتاماسىز ەتۋ جانە الەۋمەتتىك ماڭىزى بار باعىتتاردى قولداۋ ءۇشىن قازاقستاننىڭ 9 وبلىسىندا 21 سۋبسيديالاناتىن مارشرۋت جۇمىس ىستەيدى. ولاردى ىسكە اسىرۋعا 2025 جىلى 6,4 ملرد تەڭگە ءبولىندى. ءۇشارال, ءۇرجار, كوكشەتاۋ, تۇركىستان جانە باسقا دا تۋريستىك باعىتتاردى دامىتۋعا ەرەكشە نازار اۋدارىلىپ وتىر.
