جاڭالىقتار
قازاقستاندا 470 ساربازدان سۋيتسيدكە بەيىمدىلىك انىقتالدى
فوتو: istockphoto.com
بيىلعى اسكەرگە شاقىرۋ ناۋقانىندا قازاقستاندا 470 شاقىرىلۋشىدا سۋيتسيدكە بەيىمدىلىك انىقتالدى. بۇل تۋرالى قورعانىس مينيسترلىگى حابارلادى, دەپ جازدى qandastar.kz
اسكەرگە شاقىرىلۋشىلاردىڭ پسيحولوگيالىق اۋىتقۋلارىن انىقتاۋعا ۇكىمەت تاپسىرماسىمەن اسكەري پسيحولوگتار ازىرلەگەن Psy-risk ادىستەمەسى كومەكتەستى. اتالعان ازاماتتاردىڭ ءبىر بولىگى اسكەردەن بوساتىلىپ, ەندى ءبىر بولىگى قوسىمشا تەكسەرۋگە جىبەرىلدى.
“جاڭا جۇيە – كوپساتىلى پسيحودياگنوستيكا مەحانيزمى. ول باستاپقى سكرينينگتەن, تەرەڭدەتىلگەن پسيحولوگيالىق تەكسەرۋدەن جانە قاجەت بولعان جاعدايدا پسيحياتريالىق ساراپتامادان تۇرادى. باستى ماقسات – پسيحوەموتسيونالدىق تۇراقتىلىعى جەتكىلىكسىز ازاماتتاردى قارۋلى كۇشتەر قاتارىنا شاقىرماۋ”, – دەلىنگەن حابارلامادا.
ادىستەمە كەزەڭ-كەزەڭىمەن بارلىق وڭىرلەردە ەنگىزىلەدى.
ء“بىز تەك پسيحولوگيالىق تۇرعىدا تۇراقسىزداردى انىقتاۋمەن شەكتەلمەيمىز. ماقسات – بولاشاق اسكەري بولىمدەردىڭ ۇجىمدارىن ىقتيمال قاۋىپ-قاتەردەن قورعاۋ. بۇل – دەنساۋلىق, ءومىر جانە بولىمدەردەگى مورالدىق احۋال ماسەلەسى”, – دەدى قورعانىس مينيسترلىگىنىڭ پسيحولوگيالىق جانە الەۋمەتتىك جۇمىس باسقارماسىنىڭ باستىعى, پودپولكوۆنيك ارمان قالىشەۆ.
