جاڭالىقتار
قازاقستاندا ادام اعزالارىن ساۋدالاۋ دەرەگى بويىنشا 15 ءىس تىركەلگەن
فوتو: Freepik
ىشكى ىستەر مينيسترلىگى ۇيىمداسقان قىلمىسقا قارسى كۇرەس دەپارتامەنتى ءۇشىنشى باسقارماسى باستىعىنىڭ ورىنباسارى شىنار كوشەرباەۆا قازاقستاندا ادام اعزالارىن ساتۋعا قاتىستى 15 قىلمىستىق ءىس تىركەلگەنىن مالىمدەدى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.
كوشەرباەۆانىڭ ايتۋىنشا, جىل سايىن رەسپۋبليكادا ادام ساۋداسىنا قاتىستى 150-گە دەيىن قىلمىستىق ءىس قوزعالادى. ال بيىل جىل باسىنان بەرى 134 قىلمىستىق ءىس تىركەلگەن.
«ونىڭ ىشىندە ورگانداردى ساتۋ بويىنشا 15 قىلمىستىق ءىس, قاناۋ ماقساتىندا ادام ۇرلاۋ بويىنشا 2 ءىس, قاناۋ ماقساتىندا زاڭسىز باس بوستاندىعىنان ايىرۋ بويىنشا 3 ءىس, ادام ساۋداسى بويىنشا 15 ءىس تىركەلدى. ال كامەلەتكە تولماعان ادامدى جەزوكشەلىكپەن اينالىسۋعا تارتۋ بويىنشا 12 ءىس, كامەلەتكە تولماعانداردى ساتۋعا قاتىستى ۇش ءىس, جەزوكشەلىكپەن اينالىسۋعا تارتۋ فاكتىسى جەتەۋ, جەزوكشەلىكپەن اينالىسۋ جانە سۋتەنەرلىك بويىنشا 77 ءىس انىقتالدى», – دەدى كوشەرباەۆا.
ول سوڭعى جىلدارى قۇقىق قورعاۋ ورگاندارى قازاقستان ازاماتتارىن شەتەلگە شىعارۋدىڭ بىرنەشە ارناسىن توقتاتقانىن ايتتى. سونداي سوڭعى فاكتىلەردىڭ ءبىرى قازاقستاندىقتاردىڭ باحرەينگە دەپورتاتسيالانۋى بولدى.
سونداي-اق ادام ساۋداسىمەن بايلانىستى قىلمىستارعا ىقپال ەتەتىن اكىمشىلىك قۇقىق بۇزۋشىلىقتار انىقتالدى. ماسەلەن, جەزوكشەلىك پەن سۋتەنەرلىككە ءۇي-جايلار بەرگەنى ءۇشىن 649 اكىمشىلىك قۇقىق بۇزۋشىلىق تىركەلدى. ولارعا جالپى سوماسى 155 ميلليون تەڭگە ايىپپۇل سالىندى.
ايتا كەتەيىك, قازاقستاندا ادام ساۋداسىمەن اينالىسقاندار 4 جىلدان 15 جىلعا دەيىن باس بوستاندىعىنان ايىرىلادى. اعزالاردى ساتۋ ىسىنە قاتىستى دا باس بوستاندىعىنان ايىرۋ جازاسى قاراستىرىلعان.
ەسكە سالايىق, 6 شىلدەدە مەملەكەت باسشىسى «ادام ساۋداسىنا قارسى كۇرەس تۋرالى» زاڭعا قول قويىپ, ول 5 قىركۇيەكتە كۇشىنە ەنگەن ەدى. قىلمىستىق كودەكستە «ادام ساۋداسىمەن بايلانىستى قىلمىستار» دەگەن جاڭا ۇعىم پايدا بولدى. ولاردىڭ ىشىنە: ادام ۇرلاۋ, زاڭسىز باس بوستاندىعىنان ايىرۋ, ادام ساۋداسى جانە جەزوكشەلىككە تارتۋ كىردى. ادام ساۋداسىمەن كۇرەس جونىندەگى ارنايى زاڭ وسى قىلمىستىڭ قۇربانى بولعان قازاقستاندىقتاردى قورعاۋ مەن الەۋمەتتىك قولداۋدى قامتاماسىز ەتەدى.
