Jańalyqtar
Qazaqstanda adam aǵzalaryn saýdalaý deregi boıynsha 15 is tirkelgen
Foto: Freepik
Ishki ister mınıstrligi Uıymdasqan qylmysqa qarsy kúres departamenti Úshinshi basqarmasy bastyǵynyń orynbasary Shynar Kósherbaeva Qazaqstanda adam aǵzalaryn satýǵa qatysty 15 qylmystyq is tirkelgenin málimdedi. Bul týraly qandastar.kz Stan.kz aqparat agenttigine silteme jasap habarlaıdy.
Kósherbaevanyń aıtýynsha, jyl saıyn respýblıkada adam saýdasyna qatysty 150-ge deıin qylmystyq is qozǵalady. Al bıyl jyl basynan beri 134 qylmystyq is tirkelgen.
«Onyń ishinde organdardy satý boıynsha 15 qylmystyq is, qanaý maqsatynda adam urlaý boıynsha 2 is, qanaý maqsatynda zańsyz bas bostandyǵynan aıyrý boıynsha 3 is, adam saýdasy boıynsha 15 is tirkeldi. Al kámeletke tolmaǵan adamdy jezókshelikpen aınalysýǵa tartý boıynsha 12 is, kámeletke tolmaǵandardy satýǵa qatysty úsh is, jezókshelikpen aınalysýǵa tartý faktisi jeteý, jezókshelikpen aınalysý jáne sýtenerlik boıynsha 77 is anyqtaldy», – dedi Kósherbaeva.
Ol sońǵy jyldary quqyq qorǵaý organdary Qazaqstan azamattaryn shetelge shyǵarýdyń birneshe arnasyn toqtatqanyn aıtty. Sondaı sońǵy faktilerdiń biri qazaqstandyqtardyń Bahreınge deportaııalanýy boldy.
Sondaı-aq adam saýdasymen baılanysty qylmystarǵa yqpal etetin ákimshilik quqyq buzýshylyqtar anyqtaldy. Máselen, jezókshelik pen sýtenerlikke úı-jaılar bergeni úshin 649 ákimshilik quqyq buzýshylyq tirkeldi. Olarǵa jalpy somasy 155 mıllıon teńge aıyppul salyndy.
Aıta keteıik, Qazaqstanda adam saýdasymen aınalysqandar 4 jyldan 15 jylǵa deıin bas bostandyǵynan aıyrylady. Aǵzalardy satý isine qatysty da bas bostandyǵynan aıyrý jazasy qarastyrylǵan.
Eske salaıyq, 6 shildede memleket basshysy «Adam saýdasyna qarsy kúres týraly» zańǵa qol qoıyp, ol 5 qyrkúıekte kúshine engen edi. Qylmystyq kodekste «adam saýdasymen baılanysty qylmystar» degen jańa uǵym paıda boldy. Olardyń ishine: adam urlaý, zańsyz bas bostandyǵynan aıyrý, adam saýdasy jáne jezókshelikke tartý kirdi. Adam saýdasymen kúres jónindegi arnaıy zań osy qylmystyń qurbany bolǵan qazaqstandyqtardy qorǵaý men áleýmettik qoldaýdy qamtamasyz etedi.
