جاڭالىقتار
قازاقستاندا اكىمدەرگە جاڭا وكىلەتتىكتەر بەرىلەدى
قازاقستاندا «ەرىكتى» جانە «ءوزىن-ءوزى قورعاۋدى قالىپتاستىرۋ» ۇعىمدارى ەنگىزىلىپ جاتىر. ءتيىستى زاڭدى 5 مامىردا سەنات دەپۋتاتتارى قارادى, – دەپ حابارلايدى Tengrinews.kz تىلشىسى.
زاڭدا اۋماقتىق قورعانىستىڭ ماقساتتارى, مىندەتتەرى, قاعيداتتارى مەن شارالارى انىقتالعان, پرەزيدەنتتىڭ, ۇكىمەتتىڭ, قورعانىس مينيسترلىگىنىڭ وكىلەتى بەكىتىلگەن. سونداي-اق قۇجاتتا پرەزيدەنتكە تىكەلەي باعىناتىن جانە ەسەپ بەرەتىن مەملەكەتتىك ورگانداردىڭ, ورتالىق مەملەكەتتىك ورگاندار مەن اكىمدىكتەردىڭ, مەنشىك نىسانىنا قاراماستان ۇيىمداردىڭ قۇزىرەتى, سونداي-اق ازاماتتاردىڭ قۇقىقتارى مەن مىندەتتەرى ايقىندالعان.
سەناتتىڭ جالپى وتىرىسىندا دەپۋتات مارات قوجاەۆتىڭ ايتۋىنشا, اۋماقتىق قورعانىس تۋرالى زاڭعا اكىمدى اۋماقتىق قورعانىستىڭ باسشىسى ەتىپ بەلگىلەيتىن باپ ەنگىزىلمەك.
«زاڭعا سايكەس, قورعانىس مينيسترلىگى اۋماقتىق قورعانىس سالاسىنداعى ۋاكىلەتتى ورگان رەتىندە اۋماقتىق قورعانىسقا دايىندىق پەن ونى جۇرگىزۋ قاعيدالارىن ازىرلەيدى, اۋماقتىق قورعانىس وبەكتىلەرىنىڭ تىزبەسىن انىقتايدى, اۋماقتىق اسكەرلەردى قارۋ-جاراقپەن قامتاماسىز ەتەدى, سونداي-اق قارالىپ وتىرعان سالادا مەملەكەتتىك باقىلاۋ جۇرگىزەدى. سونىمەن قاتار, وسى زاڭنىڭ 13-بابىندا اكىم ءتيىستى اكىمشىلىك-اۋماقتىق بىرلىكتىڭ اۋماقتىق قورعانىسىنىڭ باسشىسى بولىپ تابىلادى جانە ونىڭ ۇيىمداستىرىلۋى مەن جاي-كۇيىنە جاۋاپتى ەكەنى بەلگىلەنگەن», – دەدى قوجاەۆ.
وسىعان بايلانىستى ول قورعانىس مينيسترلىگى وكىلىنە مىناداي سۇراق قويدى: بۇل باعىنىستىلىق پەن ەسەپتىلىك ۆەرتيكالى قالاي قۇرىلماق?
«قورعانىس مينيسترلىگى قانداي شەشىمدەر قابىلدايدى, اكىم قانداي شەشىمدەر قابىلدايدى دەگەندى ايقىندايتىن, اۋماقتىق قورعانىستى ۇيىمداستىرۋ مەن جۇرگىزۋ ماسەلەلەرىندە قايتالانۋدى نەمەسە ولقىلىقتاردى بولدىرماۋ ءۇشىن قانداي دا ءبىر زاڭعا تاۋەلدى نورماتيۆتىك-قۇقىقتىق اكت قابىلدانا ما?» – دەپ سۇرادى دەپۋتات.
قورعانىس ءمينيسترىنىڭ ءبىرىنشى ورىنباسارى سۇلتان قامالەتدينوۆ زاڭدا اكىمنىڭ اۋماقتىق قورعانىس ايماعىنىڭ باستىعى بولىپ بەلگىلەنەتىنى راس ەكەنىن ايتتى.
«وسى زاڭ قابىلدانعاننان كەيىن بىرقاتار زاڭعا تاۋەلدى اكتىلەر ازىرلەنەدى, ولاردىڭ قاتارىندا… اۋماقتىق قورعانىس جۇيەسىن ۇيىمداستىرۋ تۋرالى پرەزيدەنت جارلىعى ازىرلەنەدى. نورماتيۆتىك-قۇقىقتىق اكت جابىق سيپاتتا بولادى, وندا ۋاكىلەتتى ورگانداردىڭ, قورعانىس مينيسترلىگىنىڭ جانە جەرگىلىكتى اتقارۋشى ورگاننىڭ باعىنىستىلىعى مەن جاۋاپكەرشىلىگى ماسەلەلەرى كوزدەلەدى», – دەپ جاۋاپ بەردى قامالەتدينوۆ.
سەنات دەپۋتاتتارى زاڭدى ەكى وقىلىمدا قاراپ, ونى ماقۇلداۋعا داۋىس بەردى.
