Jańalyqtar
Qazaqstanda alǵash ret adam saýdasymen kúres týraly zań qabyldandy
Foto: ashyq derekkóz
Prezıdent Qasym-Jomart Toqaev «Adam saýdasyna qarsy kúres týraly» zańǵa qol qoıdy. Bul týraly Stan.kz aqparat agenttigi habarlaıdy.
Qylmystyq kodekste «adam saýdasymen baılanysty qylmystar» degen jańa uǵym paıda boldy. Olardyń ishine: adam urlaý, zańsyz bas bostandyǵynan aıyrý, adam saýdasy jáne jezókshelikke tartý kiredi. Adam saýdasymen kúres jónindegi arnaıy zań osy qylmystyń qurbany bolǵan qazaqstandyqtardy qorǵaý men áleýmettik qoldaýdy qamtamasyz etedi.
«Zań alǵash ret qabyldanyp, adam saýdasyna qarsy kúrestiń uıymdyq-quqyqtyq negizderin jan-jaqty aıqyndaıdy. Ol adam saýdasyna qarsy is-qımyldyń maqsattary men mindetterin, qaǵıdattaryn belgileıdi, sondaı-aq memlekettik organdardyń, jergilikti atqarýshy organdardyń jáne basqa da sýbektilerdiń adam saýdasyna qarsy is-qımyl jónindegi quzyretin aıqyndaıdy», — delingen habarlamada.
Ákimshilik quqyq buzýshylyq týraly kodeks te jańa bappen tolyqtyrylyp jatyr. Balalardy, onyń ishinde jańa týǵan nárestelerdi satý faktilerine qarsy turý úshin 135-1 «Laýazymdy tulǵalardyń jańa týǵan náresteni tastap ketý, jetim balalardy jáne ata-anasynyń qamqorlyǵynsyz qalǵan balalardy qabyldaý jáne jetkizý faktileri týraly habarlamaýy» týraly bap paıda boldy.
Sondaı-aq memleket basshysy «Qazaqstannyń keıbir zańnamalyq aktilerine adam saýdasyna, buzaqylyqqa jáne bótenniń múlkine zııan keltirýge qarsy is-qımyl máseleleri boıynsha ózgerister men tolyqtyrýlar engizý týraly» zańǵa qol qoıdy.
«Qylmystyq kodekste adam urlaý, zańsyz bas bostandyǵynan aıyrý, adamdardy, onyń ishinde kámeletke tolmaǵandardy saýdalaý, jezókshelikpen aınalysýǵa tartý jáne basqa da qaýipti áreketterdi qamtıtyn «adam saýdasymen baılanysty qylmystar» degen jańa uǵym bekitildi. Mundaı qylmystardy jasaǵany úshin tatýlasýǵa baılanysty qylmystyq jaýaptylyqtan bosatýǵa tyıym salynady», — delingen habarlamada.
Sonymen qatar jańa zańda «kámeletke tolmaǵan adamnan jezókshelikpen aınalysý nemese jynystyq sıpattaǵy qyzmet alý» úshin qylmystyq jaýapkershilik qarastyrylǵan. Zań kámeletke tolmaǵan adamdy seksýaldyq qyzmet kórsetýge, sonyń ishinde úgit-nasıhat nemese jarnama arqyly tartýdy da qylmystyq jaýapkershilikke tartady.
