جاڭالىقتار
قازاقستاندا العاشقى اەس سالىناتىن ورىن رەسمي تۇردە بەكىتىلدى
فوتو:pixabay.com
ۇكىمەت ءوز قاۋلىسىمەن قازاقستاندا العاشقى اتوم ەلەكتر ستانتسياسىن سالۋ ورنىن رەسمي تۇردە بەكىتتى. بۇل تۋرالى qandastar.kz حابارلايدى.
Stan.kz اقپارات اگەنتتىگى جازعانداي, قازاقستاندا اتوم ستانتسياسىن سالۋ ورنىن بەكىتۋ تۋرالى ۇكىمەت قاۋلىسى رەسمي نورماتيۆتىك اكتىلەر بازاسىندا جاريالاندى.
«يادرولىق قوندىرعى – «اتوم ەلەكتر ستانتسياسى» قۇرىلىسىن جۇرگىزۋ ورنى رەتىندە الماتى وبلىسىنىڭ جامبىل اۋدانى بەلگىلەنسىن», – دەلىنگەن قۇجاتتا.
پرەمەر-مينيستر ولجاس بەكتەنوۆ 30 جەلتوقساندا قۇجاتقا قول قويعان. دەگەنمەن بۇيرىق 25 اقپاندا جاريالانعان كۇنى كۇشىنە ەندى.
ايتا كەتەيىك, 8 قاڭتاردا پرەزيدەنت قاسىم-جومارت توقاەۆ ۇكىمەتكە قازاقستاندا اتوم ەلەكتر ستانتسياسىن سالۋدى تەزدەتۋدى ۇسىنعان ەدى.
ەسكە سالايىق, بۇعان دەيىن ەنەرگەتيكا مينيسترلىگى ەلىمىزدەگى اەس قۇرىلىسى شەتەلدىك نەسيەلەر ەسەبىنەن سالىناتىنىن جەتكىزدى. ايتۋىنشا, اەس سالۋعا ۇلتتىق قور مەن زەينەتاقى قورىنداعى اقشا جۇمسالمايدى. ۆەدومستۆو جەتكىزۋشىلەرگە اەس سالۋ جوباسىن قارجىلاندىرۋدىڭ ءتۇرلى نۇسقالارىن ۇسىناتىنىن ايتتى. ياعني ەكسپورتتىق نەسيە مەن حالىقارالىق قارجى ينستيتۋتتارىن قارجىلاندىرۋدى تارتاتىنىن اتاپ ءوتتى. سونىمەن قاتار اتوم ەلەكتر ستانتسيالارىن سالۋ جوباسىن قارجىلاندىرۋدىڭ ءارتۇرلى نۇسقالارى ۇسىنىلماق.
