قازاقستاندا «اراق كورولى» سۇلتان ماحمادوۆ ۇستالدى

فوتو: اشىق دەرەككوز

قارجىلىق مونيتورينگ اگەنتتىگى (قما) جامبىل وبلىسىندا «اراق كورولى» اتانعان سۇلتان ماحمادوۆ باسقارعان قىلمىستىق توپتىڭ قىزمەتى توقتاتىلعانىن حابارلادى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

اگەنتتىكتىڭ مالىمەتىنشە, «بم» جشس مەن ونىمەن بايلانىسى بار وزگە دە كومپانيالار باسشىلىعىنا قاتىستى قىلمىستىق توپ قۇرىپ, زاڭسىز كاسىپكەرلىك قىزمەتپەن اينالىسقانى بويىنشا تەرگەۋ باستالعان.

«تەرگەۋ دەرەگىنە ساي, ماحمادوۆ سۇلتاننىڭ باسشىلىعىمەن ارەكەت ەتكەن ۇيىمداسقان قىلمىستىق توپ مىندەتتى ليتسەنزياسىز جامبىل وبلىسى اۋماعىندا اكتسيزدەلەتىن ءونىم – ەتيل ءسپيرتىن جاپپاي ءوندىرۋ, ساقتاۋ, تاسىمالداۋ جانە وتكىزۋ قىزمەتىن جۇرگىزگەن.

ايتا كەتۋ كەرەك, ماحمادوۆ 2010 جىلى ءدال وسىنداي قىلمىس ءۇشىن سوتتالعان.

زاڭسىز ارەكەتتى جاسىرۋ ماقساتىندا كۇدىكتىلەر ءوز جۇمىسىن بيوەتانول مەن مال ازىعىنا ارنالعان قوسپالاردى زاڭدى تۇردە ءوندىرۋ رەتىندە كورسەتكەن.

الايدا ءىس جۇزىندە سەرىكتەستىك اۋماعىندا ونەركاسىپتىك كولەمدە ەتيل ءسپيرتىن وندىرۋگە تولىق جابدىقتالعان جاسىرىن سپيرت زاۋىتى ۇيىمداستىرىلعان», — دەلىنگەن حابارلامادا.

اگەنتتىكتىڭ دەرەگىنشە, ۇيىمداستىرۋشىلار بىرنەشە ءوڭىردى قامتيتىن وتكىزۋ جەلىسىن قۇرعان.

«ەتيل ءسپيرتىن جەتكىزۋدىڭ تۇراقتى ارناسى جولعا قويىلىپ, ول جامبىل جانە شىعىس قازاقستان وبلىستارىندا, سونداي-اق شىمكەنت قالاسىندا ورنالاسقان جاسىرىن تسەحتارعا جونەلتىلىپ وتىرعان. بۇل تسەحتاردا جەتكىزىلگەن سپيرتتەن تۇرعىنداردىڭ دەنساۋلىعىنا ەلەۋلى قاۋىپ توندىرەتىن سۋرروگات الكوگول ونىمدەرى دايىندالعان.

جەدەل-تەرگەۋ ءىس-شارالارىنىڭ ناتيجەسىندە كولەڭكەلى اينالىمنان قۇنى 280 ملن تەڭگەدەن اساتىن 122 مىڭ ليتر ەتيل ءسپيرتى تاركىلەندى.

سونىمەن قاتار وندىرىستىك بازا اۋماعىندا جۇرگىزىلگەن ءتىنتۋ بارىسىندا 18 دانا ماينينگ جابدىعى انىقتالدى. قازىرگى ۋاقىتتا تاركىلەۋ ماقساتىندا 7 اۆتوكولىككە تىيىم سالىندى. ۇيىمداستىرۋشى 2 اي مەرزىمگە قاماۋعا الىندى», — دەلىنگەن حابارلامادا.

اگەنتتىك وكىلى تەرگەۋ جالعاسىپ جاتقانىن, قر قپك-ءنىڭ 201-بابىنا سايكەس وزگە اقپارات جاريا ەتىلمەيتىنىن اتاپ ءوتتى.

ايتا كەتسەك, سۇلتان ماحمادوۆ باق-تا «اراق كورولى» دەگەن اتپەن تانىمال تارازدىق كاسىپكەر, زاڭسىز الكوگول ءوندىرۋ ىسىنە بايلانىستى اتىشۋلى قىلمىستىق ءىستىڭ باستى فيگۋرانتى سانالادى. ونىڭ بۇل لاقاپ اتى 2009 جىلى ۇيقاماقتان قاشۋعا تالپىنىس جاساعاننان كەيىن كەڭىنەن تاراعان.

سول كەزدەگى دەرەكتەرگە سۇيەنسەك, 2009 جىلدىڭ 6 تامىزىندا ماحمادوۆ كۇزەتشىلەردى الداپ, ەكىنشى قاباتتاعى جاتىن بولمەسىنىڭ تەرەزەسىنەن سەكىرىپ ءتۇسىپ, ءۇي اۋلاسىنان قارا قاقپا ارقىلى شىعىپ كەتكەن. دالادا كۇتىپ تۇرعان كولىككە وتىرىپ, بەلگىسىز باعىتقا كەتكەن.

ماحمادوۆ نەگىزىن قالاعان «بم» جشس باستاپقىدا بانكالارعا قاقپاق شىعاراتىن شاعىن ءوندىرىس بولسا, كەيىن قۇراما جەم, قۇس ەتى, بيوەتانول جانە قانت وندىرەتىن ءىرى كاسىپورىنعا اينالعان.

2010 جىلى ول زاڭسىز الكوگول ءوندىرىپ, ونى ساتقانى ءۇشىن سوتتالىپ, كولەڭكەلى بيزنەستى ۇيىمداستىرعانى دالەلدەنگەن سوڭ جازاعا تارتىلعان.