قازاقستاندا ءاربىر ءۇشىنشى ەڭبەك ميگرانتى بولىپ قىتايلىقتار جۇمىس ىستەيدى

فوتو: pixabay.com

ەڭبەك جانە حالىقتى الەۋمەتتىك قورعاۋ مينيسترلىگى قازاقستاندا 12 882 شەتەل ازاماتى جۇمىس ىستەيتىنىن ءمالىم ەتتى. بۇل تۋرالى Stan.kz اقپارات اگەنتتىگى حابارلايدى.

«شەتەل جۇمىس كۇشىن (شجك) تارتۋعا رۇقساتتاردىڭ اراسىندا مىناداي ساناتتار بار: باسشىلار مەن ولاردىڭ ورىنباسارلارى ءۇشىن 565 رۇقسات ء(بىرىنشى سانات), قۇرىلىمدىق بولىمشەلەردىڭ باسشىلارى ءۇشىن 2 671 رۇقسات (ەكىنشى سانات). تارتىلعان شجك نەگىزگى بولىگى ءۇشىنشى (ماماندار) جانە ءتورتىنشى (بىلىكتى جۇمىسشىلار) ساناتتارعا جاتادى – تيىسىنشە, ولار 5 871 جانە 595 ادام. سونداي-اق, ماۋسىمدىق جۇمىستارعا 564 ادام, ال كورپوراتيۆتىك اۋىستىرۋ اياسىندا 2 616 ادام تارتىلدى», – دەلىنگەن حابارلامادا.

بۇگىنگى تاڭدا ەلىمىزدە شەتەل جۇمىس كۇشىن پايدالاناتىن 1 657 جۇمىس بەرۋشى بار. ولاردا 456 مىڭنان استام قازاقستان ازاماتى جۇمىس ىستەيدى, بۇل قىزمەتكەرلەردىڭ جالپى سانىنىڭ 97,2% ەكەنى ايتىلدى.

سونىمەن قاتار ەكونوميكالىق قىزمەت تۇرلەرى بويىنشا ەڭ كوپ جۇمىس ىستەيتىندەر قۇرىلىس سالاسىندا – 4 326 ادام (33,5%) ىستەيتىنى انىقتالدى.

ال وڭدەۋ ونەركاسىبى – 1 370 (10,6%), تاۋ-كەن ونەركاسىبى جانە كارەرلەردى قازۋ – 1 298 (10%), كاسىبي, عىلىمي جانە تەحنيكالىق قىزمەت – 843 (6,5%) جانە اۋىل, ورمان جانە بالىق شارۋاشىلىعى – 600 ادامدى (4,6 %) قۇراپ وتىر.

مينيسترلىكتىڭ دەرەگىنشە, ەلدە قىتايدان 4 045 (31,4%), ءۇندىستاننان 1 152 (8,9%), تۇركيادان 1 110 (8,6%), وزبەكستاننان 673 (5,2%) ەڭبەك ميگرانتى كەلىپ جۇمىس ىستەيدى.

ەسكە سالايىق, ۇلتتىق قاۋىپسىزدىك كوميتەتى شەكارادان ميگرانتتاردى ارلى-بەرلى زاڭسىز وتكىزۋمەن اينالىسقان قىلمىستىق توپتى ۇستاعانىن جازدىق. مۇنداي جولمەن پايداعا كەنەلگەن 72 ادام قاماۋعا الىندى. ۇستاۋ وپەراتسياسى جەتىسۋ, جامبىل جانە تۇركىستان وبلىستارىندا جۇرگىزىلگەن. قىلمىستىق توپ قىتايدان, وزبەكستان مەن قىرعىزستاننان جۇمىسشىلاردى زاڭسىز وتكىزىپ وتىرعان.