جاڭالىقتار
قازاقستاندا ازاماتتىق قورعاۋ قىزمەتكەرلەرىنىڭ مارتەبەسى كوتەرىلەدى
فوتو: ارمان احاتوۆ
قازاقستاندا ازاماتتىق قورعاۋ قىزمەتكەرلەرىنىڭ مارتەبەسى كوتەرىلەدى, دەپ جازادى qandastar.kz
ءماجىلىس دەپۋتاتتارى ازاماتتىق قورعاۋ ماسەلەلەرى بويىنشا زاڭ جوباسىن ءبىرىنشى وقىلىمدا ماقۇلدادى. ۇسىنىلىپ وتىرعان نورمالار ازاماتتىق قورعاۋ ورگاندارى قىزمەتكەرلەرىنىڭ الەۋمەتتىك مارتەبەسىن ارتتىرۋعا, ادام كوپ جينالاتىن وبەكتىلەردى پايدالانۋعا قابىلداۋ كەزىندەگى ءورت قاۋىپسىزدىگىن باقىلاۋدى جاڭارتۋعا باعىتتالعان.
سونداي-اق قاۋىپتى وندىرىستىك وبەكتىلەردى جاڭارتۋ جانە تەحنيكالىق قايتا جاراقتاندىرۋدىڭ جيىنتىق جوسپارىن ازاماتتىق قورعاۋ سالاسىنداعى ۋاكىلەتتى ورگانمەن كەلىسۋ, سەيسميكالىق قاۋىپسىزدىكتى قامتاماسىز ەتۋ نورمالارى قاراستىرىلعان. جوبا ماجىلىسكە 2023 جىلدىڭ قازان ايىندا ءتۇستى. جۇمىس توبىنىڭ 19 وتىرىسى ءوتىپ, نەگىزگى 10 ماسەلەنى شەشۋگە باعىتتالعان 4 كودەكس پەن 17 زاڭعا تۇزەتۋلەر ەنگىزىلەدى. جوبادا ازاماتتىق قورعاۋ ورگاندارى قىزمەتكەرلەرىنىڭ مارتەبەسىن جانە ازاماتتىق قورعاۋ ورگاندارىندا قىزمەت ەتۋ ءتارتىبىن قۇقىقتىق دەڭگەيدە بەلگىلەۋ ۇسىنىلادى.
زاڭ جوباسىن قابىلداۋ قوعامدىق قاۋىپسىزدىكتى ارتتىرۋعا, ازاماتتىق قورعاۋ ورگاندارى قىزمەتكەرلەرىنىڭ ەڭبەك جاعدايىن جاقسارتۋعا, توتەنشە جاعدايلارعا دايىندىقتى ارتتىرۋعا ىقپال ەتەدى.
