جاڭالىقتار
قازاقستاندا بالاسىنا قول كوتەرگەن اتا-انالار تۇرمەگە توعىتىلاتىن بولدى
istockphoto
وسى ايدا بالا تاربيەسىنە قاتىستى زاڭعا ەنگىزىلگەن وزگەرىستەر كۇشىنە ەنەدى, دەپ جازدى qandastar.kz
بۇدان بىلاي ءوز مىندەتىن دۇرىس ورىنداماعان اتا-انالار قىلمىستىق جاۋاپكەرشىلىككە تارتىلىپ, ءۇش جىلعا دەيىن باس بوستاندىعىنان ايىرىلۋى مۇمكىن. Sputnik قازاقستان زاڭنىڭ نەگىزگى تالاپتارىن ۇسىنادى.
بۇرىن قالاي بولدى?
قىلمىستىق كودەكستەگى 140-باپ اياسىندا كامەلەتكە تولماعان بالانى تاربيەلەۋ جونىندەگى مىندەتتەردى ورىنداماۋعا قاتىستى جازا قاراستىرىلعان. سونىڭ ىشىندە بالانىڭ ءومىرى مەن دەنساۋلىعىنا دۇرىس قاراماۋ, قاتىگەزدىك تانىتۋ, قاراۋسىز قالدىرۋ نەمەسە زاڭسىز ىسكە ماجبۇرلەۋ سياقتى ارەكەتتەر بار. بۇعان دەيىن بالانى ۇرعانى ءۇشىن كوپ جاعدايدا اكىمشىلىك جازا قولدانىلاتىن. اتاپ ايتقاندا, 160 اەك-كە (2025 جىلدا – 630 مىڭ تەڭگە) دەيىنگى ايىپپۇل سالىنادى نەمەسە 40 تاۋلىككە قاماۋعا الىنادى.
ماسەلەن, بىلتىر پاۆلوداردا تۋعان قىزىن ۇرعان اكەگە قاتىستى اكىمشىلىك ءىس قوزعالعان. بىراق ايىپپۇل دا, قاماۋعا الۋ جازاسى دا قولدانىلعان جوق. ول كەزدە سوت ەر ادامعا قاتىستى كامەلەتكە تولماعاننىڭ قاۋىپسىزدىگى ماقساتىندا 30 تاۋلىك مەرزىمگە قورعاۋ ۇيعارىمىن شىعارعان. سونداي-اق ول پروفيلاكتيكالىق ەسەپكە الىندى.
زاڭعا قانداي وزگەرىستەر ەنگىزىلدى?
16 قىركۇيەكتە قىلمىستىق كودەكسكە ەنگىزىلگەن وزگەرىستەر كۇشىنە ەنەدى. وعان سايكەس, بالاسىن ۇرعان اتا-انالار نەمەسە زاڭدى وكىلدەرىنە ءىرى كولەمدە ايىپپۇل سالىنادى, يا بولماسا, تۇرمەگە توعىتىلۋى مۇمكىن.
نەگىزگى وزگەرىستەر:
ايىپپۇلدىڭ كولەمى – 1 000 اەك (2025 جىلى 3 932 000 تەڭگە);
600 ساعاتقا دەيىنگى قوعامدىق جۇمىسقا تارتۋ;
قاتىگەزدىك تانىتقانى ءۇشىن 2 جىلعا دەيىن باس بوستاندىعىنان ايىرۋ;
بىرنەشە بالاعا قاتىستى جاسالعان ارەكەت ءۇشىن 3 جىلعا دەيىن باس بوستاندىعىنان ايىرۋ.
رەسمي مالىمەتكە سايكەس, بىلتىر قازاقستاندا 600-دەن استام ادام اتا-انا قۇقىعىنان ايىرىلعان. بالانى تاربيەلەۋ جونىندەگى مىندەتتەرىن ورىنداماعان 6 مىڭ اتا-انا پروفيلاكتيكالىق ەسەپكە قويىلدى.
ايتا كەتەرى, 140-باپتا بالانىڭ اتا-اناسىنان بولەك پەداگوگتiڭ نەمەسە وقۋ, تاربيەلەۋ, ەمدەۋ مەكەمەسىنىڭ نەمەسە كامەلەتكە تولماعان ادامدى قاداعالاۋعا مiندەتتi باسقا دا مەكەمە جۇمىسكەرىنىڭ جاۋاپكەرشىلىگى دە كورسەتىلگەن. دەمەك بالانى ۇرعان تاربيەشىلەر دە تۋرا سونداي جازاعا تارتىلادى.
