قازاقستاندا بولعان سۋ تاسقىنىنا جاھاندىق جىلىنۋ پروتسەسى اسەر ەتتى – توقاەۆ

فوتو: اشىق دەرەككوز

قاسىم-جومارت توقاەۆ شىۇ وتىرىسىندا ەكولوگيا جانە كليماتتىڭ وزگەرۋىنە قارسى كۇرەس سالالارىنداعى ىنتىماقتاستىقتىڭ وزەكتىلىگىنە توقتالدى. بۇل تۋرالى Stan.kz اقپارات اگەنتتىگى حابارلايدى.

پرەزيدەنتتىڭ ايتۋىنشا, قازاقستاندا بولعان سۋ تاسقىنىنا جاھاندىق جىلىنۋ پروتسەسى اسەر ەتكەن.
ء“بىز ءتۇرلى تابيعي كاتاكليزمدەردىڭ ايتارلىقتاي كوبەيگەنىنە كۋا بولدىق. الەمدەگى بارشا مەملەكەت بۇدان وراسان زور زارداپ شەگىپ وتىر. جۋىردا قازاقستان بۇرىن-سوڭدى بولماعان سۋ تاسقىنىن باستان وتكەردى. مامانداردىڭ پىكىرىنشە, بۇل تابيعات اپاتىنىڭ اۋقىمى جاھاندىق جىلىنۋ پروتسەسىمەن تىكەلەي بايلانىستى.

كليماتتىڭ سىن-قاتەرلەرىن جالعىز ەڭسەرۋ مۇمكىن ەمەس ەكەنى انىق. الەمدىك قاۋىمداستىق ەكونوميكانى دەكاربونيزاتسيالاۋ جونىندەگى باتىل قادامىن جالعاستىرۋعا ءتيىس دەپ سانايمىن. بىراق بۇل مەملەكەتتەردىڭ دامۋعا جانە جاڭعىرۋعا باعىتتالعان ماڭىزدى مىندەتتەرىنە زيانىن تيگىزبەۋى كەرەك”, – دەدى قاسىم-جومارت توقاەۆ.

پرەزيدەنت ىشكى سۋ كوزدەرىنىڭ دەگراداتسياعا ۇشىراۋ پروبلەماسىن شەشۋ, جاڭا سۋ ۇنەمدەۋ تەحنولوگيالارىن ەنگىزۋ جونىندەگى ءىس-قيمىل جوسپارىن ازىرلەۋدى ۇسىندى. شىۇ-عا مۇشە مەملەكەتتەردىڭ بۇل باعىتتاعى ورتاق كۇش-جىگەرى بۇۇ باس اسسامبلەياسى جاريالاعان مۇزدىقتاردى ساقتاۋدىڭ حالىقارالىق جىلى اياسىنداعى ماقساتتاردى جۇزەگە اسىرۋعا شىۇ-نىڭ قوسقان ناقتى ۇلەسى بولماق.

ەسكە سالساق, بۇعان دەيىن شىۇ وتىرىسىندا بەلارۋس پرەزيدەنتى لۋكاشەنكونىڭ ارىپتەستەرىن دوللاردان باس تارتۋعا شاقىرعانى تۋرالى جازعان ەدىك.