قازاقستاندا بۇۇ-نىڭ تسيفرلىق ورتالىعى قۇرىلۋى مۇمكىن

ەلىمىزدىڭ تسيفرلىق-يننوۆاتسيالىق دامۋى الەم ەلدەرىنىڭ قىزىعۋشىلىعىن تۋعىزىپ وتىر. تايلاند استاناسى بانگكوكتا وتكەن بۇۇ-نىڭ ازيا جانە تىنىق مۇحيتى وڭىرىنە ارنالعان ەكونوميكالىق جانە الەۋمەتتىك كوميسسياسىنىڭ 80 سەسسياسى وسىنداي باستاما كوتەرىلدى. اينۇر قۋاتقىزى, ءتىلشى: — الەم قازىر جاڭا تسيفرلىق ءداۋىردىڭ تابالدىرىعىندا تۇر.

سەبەبى زاماناۋي تەحنولوگيالار كوز ىلەسپەس جىلدامدىقپەن دامىپ بارادى. الەمدىك ساراپشىلار بۇل كوشتەن ازيا-تىنىق مۇحيتى ايماعىنا مۇشە ەلدەر دە قالماۋى كەرەك دەپ وتىر. بۇل تۇرعىدا تسيفرلىق يننوۆاتسياسى دامىعان قازاقستاننىڭ تاجىريبەسىنە سۇيەنۋدى كوزدەيدى.  ءبىزدىڭ ەل بۇۇ-نىڭ ازيا-تىنىق مۇحيتى ەلدەرىنە تسيفرلاندىرۋدىڭ وزىق ۇلگىسىن كورسەتىپ, تاجىريبەسىمەن بولىسپەك. ولاي دەيتىنىمىز بۇگىندە قازاقستان ەلەكتروندى مەملەكەتتىك قىزمەتتەردىڭ دامۋى بويىنشا الەمدە 28, ال ونلاين-قىزمەتتەردىڭ ساپاسى بويىنشا 8-ورىندا تۇر.

مەملەكەتتىك قىزمەتتەردىڭ 90 پايىزدان استامى اۆتوماتتاندىرىلعان. ياعني بۇل سالادا كوپ ەلدەن كوش ىلگەرىمىز. مۇرات نۇرتىلەۋ, قر پرەمەر-ءمينيسترىنىڭ ورىنباسارى — سىرتقى ىستەر ءمينيسترى: — Google, Microsoft سىندى كوپتەگەن كومپانيالاردى قوسا العاندا, 900-دەن استام كاسىپورىن ءبىزدىڭ نارىقتا ءساتتى جۇمىس ىستەپ جاتىر. سوڭعى ءۇش جىلدا قازاقستاننىڭ جوعارى تەحنولوگيالىق سەكتورىنىڭ ەكسپورتى ون ەسە ءوستى. ال 2026 جىلعا قاراي ول 1 ميلليارد دوللارعا جەتەدى دەپ كۇتىلۋدە.

بۇل دەگەنىمىز وسى سالادا جاڭا بيزنەس نىساندارىن اشىپ, ەل ەكونوميكاسىن ىلگەرلەتۋگە سەپتىگىن تيگىزەدى دەگەن ءسوز. ءارى توعىز جولدىڭ تورابىنداعى قازاقستانعا شەتەلدىك ينۆەستيتسيالار اعىنى دا ارتادى. ايتا كەتەيىك, پرەزيدەنت قاسىم-جومارت توقاەۆ قازاقستاندى IT-تەحنولوگياسى وزىق دامىعان ەلگە اينالدىرۋ قاجەتتىگىن ايتقان بولاتىن.  اسقار جامباكين, قر تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى: — بيىل كۇزدە استانادا بۇۇ-نىڭ ۇيىمداستىرۋىمەن مينيسترلەر دەڭگەيىندە تسيفرلىق كونفەرەنتسيا وتەدى.

كونفەرەنتسياعا 62 ەل قاتىسادى دەپ جوسپارلانعان. وندا ءبىزدىڭ ەل مەملەكەتتىك قىزمەتتەردى تسيفرلاندىرۋ سالاسىندا ءوزىنىڭ جەتىستىكتەرىمەن بولىسەدى. بۇگىنگى جيىندا دا ءبىزدىڭ قىزمەت كورسەتۋ, وتباسىنىڭ تسيفرلىق كارتاسى سىندى قىزمەتتەرىمىزگە قىزىققاندار كوپ بولدى. ءبىز ءوز تاجىريبەمىزبەن بولىسۋگە دايىنبىز. كەلەسى جىلعا قاراي تسيفرلىق تەحنولوگيالاردىڭ الەمدىك نارىعى 50 پايىزعا ءوسىپ, 6,8 تريلليون دوللارعا جەتەدى.

تەحنولوگيالىق دامۋ دەڭگەيى ءارتۇرلى ەلدەردى قامتيتىن ازيا-تىنىق مۇحيتى ايماعى ءوزارا ءتيىمدى يننوۆاتسيالار ءۇشىن بىرەگەي مۇمكىندىكتەر ۇسىنادى.  تيتسيانا بوناپاچە, بۇۇ دەپارتامەنت ديرەكتورى: — ءبىزدىڭ ۇيىم مۇشەلەرى قازاقستاننىڭ تسيفرلىق تەحنولوگيالار سالاسىنداعى جەتىستىكتەرىن جوعارى باعالايدى. قازاقستاندىق كاسىپكەرلەردىڭ, اسىرەسە جاس ستارتاپتاردىڭ تاپقىرلىعىنا ءتانتىمىز.

ولاردىڭ تۇراقتى دامۋعا كومەكتەسەتىن تسيفرلىق شەشىمدەرىن ۇيرەنۋگە نيەتتىمىز. سونداي-اق ەۋروپا, ازيا جانە تاياۋ شىعىستىڭ توعىسقان جەرىندەگى ستراتەگيالىق كولىك تورابى رەتىندە قازاقستان جەتەكشى IT-پروۆايدەرلەرمەن بىرنەشە لوگيستيكالىق جوبانى جۇزەگە اسىرىپ جاتىر.

ال وسى تۇستا ازيا-تىنىق مۇحيتى ايماعى ءوزارا ءتيىمدى يننوۆاتسيالار ءۇشىن بىرەگەي مۇمكىندىكتەر ۇسىندى.