قازاقستاندا ديماش قۇدايبەرگەننىڭ حالىقارالىق مۋزىكالىق جوباسىنىڭ ءتۇسىرىلىمى باستالادى

قىركۇيەك ايىندا قازاقستاندا قىتاي-قازاقستان بىرلەسكەن جاڭا حالىقارالىق مۋزىكالىق جوبانىڭ ءتۇسىرىلىمى باستالادى. جوباعا الەمنىڭ ءار تۇكپىرىنەن ۆوكاليستەر قاتىسىپ, ەلدىڭ ەڭ اسەم ايماقتارىنا ساياحات جاسايدى. پروديۋسەرلىك جۇمىستى ايگىلى قازاقستاندىق ءانشى ديماش قۇدايبەرگەن اتقارادى, دەپ حابارلايدى Qandastar.kz dimashnews.com سايتىنا سىلتەمە جاساپ.

ءتۇسىرىلىم 8-29 قىركۇيەك ارالىعىندا تۇركىستان, الماتى, اقتاۋ جانە استانا قالالارىندا وتپەك. جوبا حالىقارالىق ارنالار ارقىلى بۇكىل الەمگە تارالىپ, ميلليونداعان كورەرمەن قازاقستاننىڭ سۇلۋلىعىن جانە ءتۇرلى ەلدەردىڭ جاڭا ورىنداۋشىلارىن تاماشالاۋعا مۇمكىندىك الادى.

شامامەن ون جىل بۇرىن مەنىڭ Hunan TV-دەگى ساپارىم «ءانشى» شوۋىنان باستالعان ەدى. بۇگىن مەن حالىقارالىق شوۋدى جاساۋشى رەتىندە جاڭا رولدە ورالىپ وتىرمىن. بۇل – بۇكىل الەمدەگى ادامداردى بىرىكتىرەتىن مادەني ىنتىماقتاستىق پەن مۋزىكا تاريحىنداعى جاڭا تاراۋ, – دەدى ديماش قۇدايبەرگەن.

ءانشى سونداي-اق جوبانىڭ جۇزەگە اسىرىلۋى قىتايدىڭ ءىرى مەديا-حولدينگتەرىنىڭ ءبىرى Hunan TV-مەن سەرىكتەستىك اياسىندا ءجۇرىپ جاتقانىن اتاپ ءوتتى.