قازاقستاندا ديپفەيك ءۇشىن ايىپپۇل سالىنادى

جاساندى ينتەللەكت تۋرالى زاڭ جوباسىنىڭ اۆتورى, دەپۋتات ەكاتەرينا سمىشلياەۆا قازاقستاندا ادامنىڭ داۋسىن نەمەسە بەينەسىن قولدان جاساپ, الداۋ ماقساتىندا پايدالاناتىن ديپفەيك تەحنولوگياسى ءۇشىن ايىپپۇل سالىناتىنىن مالىمدەدى. بۇل تۋرالى qandastar.kz سايتى حابارلايدى.

دەپۋتاتتىڭ ايتۋىنشا, ديپفەيكتەر قوعام پىكىرىنە اسەر ەتىپ, ادامداردى اداستىرۋى مۇمكىن. سوندىقتان مۇنداي تەحنولوگيالاردى قولدانۋعا تىيىم ەنگىزىلەدى. اسىرەسە بۇقاراعا تانىمال ادامدار ءجيى زارداپ شەگەدى, ويتكەنى ولاردىڭ جەكە دەرەكتەرى كەلىسىمسىز پايدالانىلادى.

ء«بىز بۇل تىيىمدى زاڭ جوباسىنا ەنگىزدىك. قازىر ديپفەيك جاساۋعا مۇمكىندىك بەرەتىن جۇيەلەردىڭ يەلەرىنە 15-تەن 100-گە دەيىن ايلىق ەسەپتىك كورسەتكىش كولەمىندە ايىپپۇل سالۋ قاراستىرىلىپ وتىر (شامامەن 59 مىڭنان 393 مىڭ تەڭگەگە دەيىن). بۇل كاسىپكەرلىك سۋبەكتىسىنە بايلانىستى بولادى», – دەدى دەپۋتات سمىشلياەۆا.

قازىرگى كەزدە ءماجىلىس دەپۋتاتتارى ديپفەيكتى تاراتۋ ءۇشىن قىلمىستىق كودەكستە جازا قاراستىرۋ كەرەك پە, جوق پا دەگەن ماسەلەنى تالقىلاپ جاتىر.

«جازا تەك ناقتى قۇقىقبۇزۋشىلىق قۇرامى انىقتالعاننان كەيىن, ءتيىستى كەلىسىمدەردەن وتكەن سوڭ عانا ەنگىزىلەدى. قىلمىستىق كودەكس وتە ماڭىزدى قۇرال, ونى وتە مۇقيات قولدانۋ كەرەك», – دەدى دەپۋتات.