قازاقستاندا دوللار 1000 تەڭگەگە جەتەدى – ەكونوميست

فوتو: اشىق دەرەككوز

قازاقستاندىق ەكونوميست دوللاردىڭ 1000 تەڭگەگە دەيىن كوتەرىلۋى مۇمكىن ەكەنىن ايتتى. بۇل تۋرالى  qandastar.kz  Stan.kz اقپارات اگەنتتىگىنە سىلتەمە جاساپ حابارلايدى.

بۇعان دەيىن قازاقستانداعى اقشا ايىرباستاۋ پۋنكتەرىندە دوللار باعامى 500 تەڭگەگە جەتكەنى تۋرالى جازعان ەدىك.

وتاندىق ەكونوميست ءسابيت رىسباەۆ Facebook پاراقشاسىندا ۇلتتىق ۆاليۋتانىڭ بولاشاعىنا الاڭداۋشىلىق ءبىلدىرىپ, جازبا جاريالادى. ونىڭ پىكىرىنشە, الداعى ۋاقىتتا تەڭگەنى كەزەكتى اۋىر دەۆالۆاتسيا كۇتىپ تۇر. ول بولجامدارىندا وتكەن تاجىريبەگە جانە الەمدەگى قازىرگى ساياسي-ەكونوميكالىق وقيعالارعا سۇيەنەدى.

“رەسەيدىڭ ورتالىق بانكىسى وتكەن ايدا پايىزدىق ستاۆكانى 21%-گە كوتەردى. رەسەيدىڭ تاريحىندا بولماعان مۇنداي پايىز. يپوتەكالىق كرەديتتەرى 40%-دان استى. رەسەي دوللاردى ۇستاپ تۇرۋ ءۇشىن ءماجبۇرلى تۇردە باردى بۇعان. جەلتوقساندا تاعى دا وتىرىس بولادى. سول كەزدە 23%-كە شىعارادى ەكەن دەگەن سىبىس بار”, – دەيدى ساراپشى ءوز جازباسىندا.

ەكونوميست تەڭگەنىڭ باعامى رەسەيلىك رۋبلگە تىعىز بايلانىستى ەكەنىن اتاپ ءوتتى.

“رەسەيدە 1998-دە دەۆالۆاتسيا بولدى. رۋبل 4 ەسە قۇنسىزداندى. قازاقستاندا 1999-دا پرەزيدەنتتىك سايلاۋ ءوتتى. ارتىنان تەڭگە 2 ەسە قۇنسىزداندى. رەسەيدە 2014-تە رۋبل 1 تۇندە 2 ەسە قۇنسىزداندى. قازاقستاندا 2015-تە سايلاۋ ءوتتى. ارتىنان تەڭگە قۇنسىزداندى. رەسەيدەگى رۋبلگە كۇنىمىز قاراپ وتىر. ودان بەرى ءتۇرلى وداقتارعا كىرىپ الدىق. الدا بىزگە دە وڭاي بولايىن دەپ تۇرعان جوق. ايدىڭ كۇننىڭ امانىندا ۇلتتىق بانك تەڭگەنى ۇستاي الماۋدا. ەرتەڭ رۋبل تاعى دا 2-3 ەسە قۇنسىزدانسا, قازاقستاندا دوللار 1000-نان اسادى”, – دەلىنگەن جازبادا.

ەسكە سالساق, بۇعان دەيىن ماماندار دوللار قۇنىنىڭ نە سەبەپتى شارىقتاپ كەتكەنىن تۇسىندىرگەن ەدى.