قازاقستاندا ەكىنشى اەس قۇرىلىسىنا قاتىستى شەشىم كۇزدە قابىلدانادى

قازاقستاندا سالىناتىن ەكىنشى اتوم ەلەكتر ستانتسياسىنىڭ (اەس) قۇرىلىسى بويىنشا ناقتى شەشىم بيىل كۇزدە قابىلدانادى. بۇل تۋرالى ءبىرىنشى ۆيتسە-پرەمەر رومان سكليار «ورتالىق ازيا – قىتاي» ءسامميتى اياسىندا مالىمدەدى, دەپ حابارلايدى qandastar.kz

ونىڭ ايتۋىنشا, جوبا قىتاي تاراپىمەن بىرلەسىپ جۇزەگە اسىرىلادى. قۇرىلىسقا قىتايدىڭ جەتەكشى اتوم كومپانياسى قاتىسادى جانە تەحنيكالىق قولداۋ كورسەتەدى. “جۇمىستى سوزبالاڭعا سالۋ جوسپاردا جوق. كۇزگە دەيىن نەگىزگى دەرەكتەر مەن جوبانىڭ جۇزەگە اساتىن الاڭى ناقتىلانادى. مۇمكىن, بۇدان ەرتەرەك تە بەلگىلى بولۋى ىقتيمال” – دەدى سكليار. ول سونداي-اق ەكى اەس قۇرىلىسىنىڭ ناقتى قۇنى جوبانىڭ تەحنيكو-ەكونوميكالىق نەگىزدەمەسى دايىن بولعان سوڭ جاريالاناتىنىن اتاپ ءوتتى. ەسكە سالايىق, قازاقستانداعى العاشقى اتوم ستانتسياسى الماتى وبلىسىنىڭ جامبىل اۋدانىندا بوي كوتەرمەك.

Skifnews.kz جازعانداي, بۇل نىساندى رەسەيلىك «روساتوم» كومپانياسى سالادى. ال ەكىنشى اەس-ءتى قىتايدىڭ CNNC كورپوراتسياسى تۇرعىزۋى مۇمكىن ەكەنىن بۇعان دەيىن اتوم ەنەرگەتيكاسى اگەنتتىگىنىڭ باسشىسى الماسادام ساتقاليەۆ حابارلاعان ەدى.