قازاقستاندا ينكليۋزيۆتى ءبىلىم بەرۋدىڭ ۇزدىكسىز جۇيەسىنىڭ ۇلتتىق مودەلى ەنگىزىلەدى

بۇگىندە ەلىمىزدەگى مەكتەپتەردىڭ 86%-دان استامىندا ينكليۋزيۆتى ءبىلىم الۋ مۇمكىندىكتەرى قاراستىرىلعان. بۇل تۋرالى بۇۇ-نىڭ جەنەۆاداعى مۇگەدەكتەردىڭ قۇقىقتارى تۋرالى كونۆەنتسيادا قر وقۋ-اعارتۋ ۆيتسە-ءمينيسترى ەدىل وسپان مالىمدەدى.

ول ءوز سوزىندە, ينكليۋزيۆتى وقىتۋ – ءبىلىم سالاسىن دامىتۋدىڭ نەگىزگى قۇرىلىمى رەتىندە تانىلعانىن اتاپ ءوتتى. قازاقستان ۇكىمەتى ەرەكشە ءبىلىم بەرۋ قاجەتتىلىكتەرى بار بالالاردى وقىتۋدىڭ قولجەتىمدىلىگىن قامتاماسىز ەتۋ جانە ءبىلىم ساپاسىن ارتتىرۋ بويىنشا كەشەندى جۇمىستار جۇرگىزۋدە.

«ينكليۋزيۆتى ءبىلىم بەرۋدى دامىتۋ جونىندە ستراتەگيالار مەن باعدارلامالار ازىرلەندى. الداعى ۋاقىتتا پەداگوگتەر ءۇشىن وقىتۋ سەمينارلارى مەن ترەنينگتەر ۇيىمداستىرىلىپ, مەكتەپتەر مەن وقۋ ورىندارىنىڭ باستامالارى قولداۋ تابادى. ارنايى ءبىلىم بەرۋ ۇيىمدارىنىڭ جەلىسى 68 بىرلىككە ۇلعايدى. مەكتەپتەر بازاسىندا ينكليۋزيانى قولداۋدىڭ 708 كابينەتى, 22 رەسۋرستىق كونسۋلتاتيۆتىك ورتالىق اشىلدى. وقۋ مەكەمەلەرىنە 2,5 مىڭعا جۋىق پەداگوگ-اسسيستەنت, 9,7 مىڭ ارنايى پەداگوگ, 12 مىڭنان استام پەداگوگ-پسيحولوگ جانە الەۋمەتتىك پەداگوگتەر جۇمىسقا قابىلداندى. 600-دەن استام ارنايى وقۋ باعدارلامالارى ازىرلەندى. كەدەرگىسىز جانە ينكليۋزيۆتى ورتانى قالىپتاستىرۋ ءۇشىن وقۋ ورىندارىندا ينكليۋزيۆتى ءبىلىم بەرۋدىڭ ۇزدىكسىز جۇيەسىنىڭ ۇلتتىق مودەلى ەنگىزىلەتىن بولادى», – دەدى ەدىل وسپان.

قازىرگى تاڭدا قازاقستاندا ەرەكشە ءبىلىم بەرۋ قاجەتتىلىكتەرى بار 200 مىڭنان استام بالا بار. ولار ءۇشىن ارنايى ءبىلىم بەرۋ ۇيىمدارىنىڭ جەلىسى قۇرىلعان. اتاپ ايتقاندا, 44 ارنايى بالاباقشا, 99 ارنايى مەكتەپ, 99 پمپك, 212 پپتك, 10 اۋتيزم ورتالىعى جانە 13 وڭالتۋ ورتالىعى بار. ال قالعان بالالار ينكليۋزيا جاعدايىندا جالپى ءبىلىم بەرەتىن مەكتەپتەردە وقيدى. 2023 جىلى قاراشادا وقۋ-اعارتۋ مينيسترلىگىنىڭ جانىنان ءبىلىم بەرۋدىڭ بارلىق دەڭگەيلەرىندە جالپى ساياساتتى ىسكە اسىرۋ ماقساتىندا ارنايى جانە ينكليۋزيۆتى ءبىلىم بەرۋ دەپارتامەنتى قۇرىلدى.