جاڭالىقتار
قازاقستاندا iPhone قىمباتتايدى
Apple بيىل كۇزگە جوسپارلاعان جاڭا iPhone مودەلدەرىنىڭ باعاسىن كوتەرۋ مۇمكىندىگىن قاراستىرىپ جاتىر, دەپ حابارلايدى qandastar.kz سايتى.
تەلەفونداردى قىمباتتاتۋدىڭ نەگىزگى سەبەبى – اقش-تىڭ قىتايدا جاسالعان سمارتفوندارعا سالىنعان 20%-دىق يمپورتتىق باج سالىعىنىڭ كۇشىندە قالۋى. بۇل سالىقتار دونالد ترامپ پرەزيدەنت بولعان ۋاقىتتا قىتايمەن ساۋدا سوعىسى بارىسىندا ەنگىزىلگەن ەدى. سوڭعى كەلىسسوزدەر كەزىندە قانداي دا ءبىر جەڭىلدىكتەر جاسالعانىمەن, سمارتفوندارعا قاتىستى تاريفتەر وزگەرىسسىز قالدى. وسىعان بايلانىستى Apple شىعىنداردى وتەۋدىڭ جولدارىن ىزدەۋگە ءماجبۇر.
Apple iPhone قۇنىنىڭ ءوسۋىن ساۋدا شەكتەۋلەرىمەن بايلانىستىرۋدى جوسپارلامايدى. ينسايدەرلەردىڭ ايتۋىنشا, كەرىسىنشە, Apple جاڭا iPhone مودەلدەرىندەگى يننوۆاتسيالىق فۋنكتسيالاردى, جەتىلدىرىلگەن ديزاين مەن ونىمدىلىكتى العا تارتپاق.
باعانىڭ ءوسۋى iPhone Pro جانە Pro Max سەكىلدى فلاگماندىق مودەلدەرگە قاتىستى بولادى دەگەن بولجام بار. بۇل قۇرىلعىلار ءالى دە قىتايداعى زاۋىتتاردا جينالادى.
بۇگىندە Apple جەتكىزۋ تىزبەگىن ءارتاراپتاندىرۋدى باستاپ كەتكەن. كومپانيا وندىرىستىك قۋاتتىڭ ءبىر بولىگىن ۇندىستانعا اۋىستىرىپ جاتىر. الايدا قازى قىتاي جوعارى ساناتتى قۇرىلعىلارعا ارنالعان كومپونەنتتەردى جيناقتاۋ مەن جەتكىزۋدىڭ نەگىزگى ورتالىعى بولىپ وتىر.
ساراپشىلاردىڭ بولجامىنشا, اقش نارىعىن تولىقتاي ۇندىستانداعى ءوندىرىس ەسەبىنەن قامتاماسىز ەتۋ 2026–2027 جىلدارعا دەيىن مۇمكىن بولمايدى.
Apple كومپانياسىنىڭ باس ديرەكتورى تيم كۋك ينۆەستورلاردى الداعى توقساندا ساۋدا باج سالىعى كومپانياعا قوسىمشا 900 ميلليون دوللار شىعىن اكەلەتىنىن ەسكەرتتى. ول وندىرىستىڭ ءبىر بولىگىن اقش-قا كوشىرۋ جوسپارى بار ەكەنىن راستادى. الايدا جەرگىلىكتى ءوندىرىستى جولعا قويۋ شىعىندارىنا بايلانىستى بۇل پروتسەسس بىرنەشە جىلعا سوزىلۋى مۇمكىن ەكەنىن ايتادى.
