قازاقستاندا كازينو جاپپاي جابىلىپ جاتىر

فوتو:freepik

سوڭعى 12 جىلدا قازاقستاندا جۇمىس ىستەيتىن كازينولار سانى 3,6 ەسە ازايدى. بۇل ءۇردىس شەنەۋنىكتەردى الاڭداتىپ وتىر — جۇمىس ورىندارى قىسقارىپ, بيۋدجەتكە تۇسەتىن كىرىس پەن تۋريزم اعىنى دا كەمىگەن. ال كازينو يەلەرى بيزنەسكە قولبايلاۋ بولىپ وتىرعان اسا جوعارى سالىقتارعا شاعىمدانىپ جاتىر. بۇل تۋرالى «كۋرسيۆ» باسىلىمى مالىمدەدى, دەپ حابارلايدى  qandastar.kz  Dalanews.kz-كە سىلتەمە جاساپ.

مادەنيەت جانە اقپارات مينيسترلىگىنىڭ تۋريزم كوميتەتى بۇل جاعدايدى 2017 جىلى قابىلدانعان وزگەرىستەرمەن تۇسىندىرەدى. اتاپ ايتقاندا, سول جىلى ويىن ۇستەلدەرى مەن اۆتوماتتارىنا سالىناتىن سالىق مولشەرى ەكى ەسەگە ارتقان.

ويىن بيزنەسى تۋرالى زاڭعا سايكەس, كازينو تەك ءۇش جۇلدىزدان تومەن ەمەس قوناقۇي كەشەنىندە ورنالاسۋى ءتيىس. سونداي-اق, كەمىندە 30 ويىن ۇستەلى مەن 60 ويىن اۆتوماتى بولۋى مىندەتتى.

ويىن ايماعى رەتىندە 2007 جىلى بەكىتىلگەن كوناەۆ قالاسىندا (بۇرىنعى قاپشاعاي) بىرنەشە كازينو جۇمىس ىستەپ كەلەدى. الايدا قالا ينفراقۇرىلىمىنىڭ دامۋى مەن تۋريستىك احۋالدىڭ قازىرگى جاي-كۇيى قوعام تاراپىنان ءتۇرلى پىكىر تۋدىرۋدا. كەي ساراپشىلار كوناەۆتىڭ تۋريزم ورتالىعى رەتىندە تولىققاندى قالىپتاسپاۋىن ينفراقۇرىلىم تاپشىلىعىمەن بايلانىستىرادى.

كەيبىر شەتەلدىك قوناقتار دا وڭىرلىك ويىن مەكەمەلەرىندەگى جاعدايعا قاتىستى پىكىر ءبىلدىرىپ, كليەنتتەر سانىنىڭ ازدىعىن اتاپ وتكەن.

بۇل تۇجىرىمدى موڭعوليادان كەلگەن ويىنشىلار دا جاناما تۇردە راستادى. ولار الماتىعا ىسساپارمەن كەلىپ, جولاي كوناەۆتاعى كازينوعا سوققان. ايتۋىنشا, ولار $3 مىڭ ۇتىلىپ, بار بولعانى 700 تەڭگە ۇتىپ كەتكەن.

«مۇندا ادامدار از, بوس تۇرعان ۇستەلدەر كوپ. كوپ ادام بولسا, جەڭىسكە جەتۋ مۇمكىندىگى ارتادى ءارى قىزىقتىراق بولادى. ءبىز ماكاو, مونتە-كارلو, كورەيادا وينادىق. قازاقستاندا قىتايلىقتار از ەكەن, ال الەمدەگى كازينونىڭ تۇراقتى كليەنتتەرى — ءدال سولار», — دەيدى ولار.

كازينو قىزمەتكەرلەرىنىڭ ايتۋىنشا, جابىلۋدىڭ باستى سەبەبى — سالىق. 2018 جىلدان باستاپ قازاقستاندا جاڭا سالىق كودەكسى كۇشىنە ەنىپ, سالىق مولشەرى ەكى ەسەگە ارتقان. مىسالى, ءبىر عانا ويىن ۇستەلىنە سالىناتىن سالىق — 830 اەك-تەن 1 660 اەك-كە (شامامەن 3,9 ملن تەڭگە) دەيىن وسكەن. بۇل كورشى ەلدەرمەن سالىستىرعاندا اناعۇرلىم جوعارى. ماسەلەن, قىرعىزستاندا بۇل كورسەتكىش ەكى ەسە, رەسەيدە 2,5 ەسە تومەن.

سونداي-اق زاڭ بويىنشا كازينو تەك 3 جۇلدىزدان تومەن ەمەس قوناقۇي كەشەنىندە ورنالاسۋى كەرەك جانە كەمىندە 30 ويىن ۇستەلى مەن 60 اۆتومات بولۋى شارت.

بۇدان بولەك, قىزمەتكەر جابىلىپ قالعان «ازيا» كازينوسىنىڭ تاريحىن مىسال ەتەدى. عيمارات 2015-2017 جىلدارى سالىنىپ, فيلم تۇسىرىلگەنىمەن, سالىقتىڭ كوتەرىلۋى سالدارىنان اشىلماي قالعان.

«كازينونى اشۋعا دايىن تۇرعان كاسىپكەرلەر سالىق كۇرت كوتەرىلگەننەن كەيىن جوسپارىنان باس تارتتى. ەندى مۇنداي تاۋەكەلگە قاي ينۆەستور بارادى?» — دەيدى ول.

ايتۋىنشا, ءىرى كازينو جىلىنا ورتا ەسەپپەن 2,6–2,7 ملرد تەڭگە سالىق تولەيدى.