Qazaqstanda kazıno jappaı jabylyp jatyr

Foto:freepik

Sońǵy 12 jylda Qazaqstanda jumys isteıtin kazınolar sany 3,6 ese azaıdy. Bul úrdis sheneýnikterdi alańdatyp otyr — jumys oryndary qysqaryp, bıýdjetke túsetin kiris pen týrızm aǵyny da kemigen. Al kazıno ıeleri bızneske qolbaılaý bolyp otyrǵan asa joǵary salyqtarǵa shaǵymdanyp jatyr. Bul týraly «Kýrsıv» basylymy málimdedi, dep habarlaıdy  qandastar.kz  Dalanews.kz-ke silteme jasap.

Mádenıet jáne aqparat mınıstrliginiń Týrızm komıteti bul jaǵdaıdy 2017 jyly qabyldanǵan ózgeristermen túsindiredi. Atap aıtqanda, sol jyly oıyn ústelderi men avtomattaryna salynatyn salyq mólsheri eki esege artqan.

Oıyn bıznesi týraly zańǵa sáıkes, kazıno tek úsh juldyzdan tómen emes qonaqúı kesheninde ornalasýy tıis. Sondaı-aq, keminde 30 oıyn ústeli men 60 oıyn avtomaty bolýy mindetti.

Oıyn aımaǵy retinde 2007 jyly bekitilgen Konaev qalasynda (burynǵy Qapshaǵaı) birneshe kazıno jumys istep keledi. Alaıda qala ınfraqurylymynyń damýy men týrıstik ahýaldyń qazirgi jaı-kúıi qoǵam tarapynan túrli pikir týdyrýda. Keı sarapshylar Konaevtyń týrızm ortalyǵy retinde tolyqqandy qalyptaspaýyn ınfraqurylym tapshylyǵymen baılanystyrady.

Keıbir sheteldik qonaqtar da óńirlik oıyn mekemelerindegi jaǵdaıǵa qatysty pikir bildirip, klıentter sanynyń azdyǵyn atap ótken.

Bul tujyrymdy Mońǵolııadan kelgen oıynshylar da janama túrde rastady. Olar Almatyǵa issaparmen kelip, jolaı Konaevtaǵy kazınoǵa soqqan. Aıtýynsha, olar $3 myń utylyp, bar bolǵany 700 teńge utyp ketken.

«Munda adamdar az, bos turǵan ústelder kóp. Kóp adam bolsa, jeńiske jetý múmkindigi artady ári qyzyqtyraq bolady. Biz Makao, Monte-Karlo, Koreıada oınadyq. Qazaqstanda qytaılyqtar az eken, al álemdegi kazınonyń turaqty klıentteri — dál solar», — deıdi olar.

Kazıno qyzmetkerleriniń aıtýynsha, jabylýdyń basty sebebi — salyq. 2018 jyldan bastap Qazaqstanda jańa Salyq kodeksi kúshine enip, salyq mólsheri eki esege artqan. Mysaly, bir ǵana oıyn ústeline salynatyn salyq — 830 AEK-ten 1 660 AEK-ke (shamamen 3,9 mln teńge) deıin ósken. Bul kórshi eldermen salystyrǵanda anaǵurlym joǵary. Máselen, Qyrǵyzstanda bul kórsetkish eki ese, Reseıde 2,5 ese tómen.

Sondaı-aq zań boıynsha kazıno tek 3 juldyzdan tómen emes qonaqúı kesheninde ornalasýy kerek jáne keminde 30 oıyn ústeli men 60 avtomat bolýy shart.

Budan bólek, qyzmetker jabylyp qalǵan «Azııa» kazınosynyń tarıhyn mysal etedi. Ǵımarat 2015-2017 jyldary salynyp, fılm túsirilgenimen, salyqtyń kóterilýi saldarynan ashylmaı qalǵan.

«Kazınony ashýǵa daıyn turǵan kásipkerler salyq kúrt kóterilgennen keıin josparynan bas tartty. Endi mundaı táýekelge qaı ınvestor barady?» — deıdi ol.

Aıtýynsha, iri kazıno jylyna orta eseppen 2,6–2,7 mlrd teńge salyq tóleıdi.