قازاقستاندا كيىكتەردى اتۋ باستالدى

فوتو: gov.kz

باتىس قازاقستان وبلىسى اكىمدىگى وڭىردە كيىك سانىن رەتتەۋ جۇمىستارى رەسمي تۇردە باستالعانىن مالىمدەدى, دەپ حابارلايدى Qandastar.kz.

ۆەدومستۆو دەرەگىنشە, كيىك اتۋ جۇمىستارى 30 قاراشاعا دەيىن جالعاسادى, وعان 40-قا جۋىق مامان تارتىلىپ, 4 ارنايى بريگادا جاساقتالعان. ءار بريگادا 3 تەحنيكامەن قامتاماسىز ەتىلگەن, جالپى سانى 12 تەحنيكا جۇمىلدىرىلعان.

«كيىك پوپۋلياتسياسىن رەتتەۋ تابيعي تەپە-تەڭدىكتى ساقتاۋ, جايىلىم جەرلەرگە زيان كەلتىرمەۋ جانە اۋىل شارۋاشىلىعى القاپتارىن قورعاۋ ماقساتىندا ۇيىمداستىرىلىپ وتىر», – دەلىنگەن حابارلامادا.

اكىمدىك مالىمەتىنشە, 2025 جىلى جۇرگىزىلگەن اۆياتسيالىق ەسەپكە سايكەس, باتىس قازاقستان وبلىسى اۋماعىندا كيىكتەردىڭ جالپى سانى 2,3 ملن باسقا جەتكەن. عالىمدار ازىرلەگەن بيولوگيالىق نەگىزدەمەگە سايكەس, پوپۋلياتسياعا زالال كەلتىرمەي, ونىڭ تەك 20 پايىزىنا, ياعني 460 مىڭعا دەيىن عانا رەتتەۋ جۇرگىزۋگە بولادى.

اۋلانعان كيىك ەتى ارنايى بەلگىلەنگەن ەت وڭدەۋ كاسىپورىندارىنا جەتكىزىلمەك.

«اتاپ ايتقاندا, بۇل ونىمدەردى «كۋبلەي» جشس, «جەڭىس» جك, «باتىس-نىق» جشس جانە «حايروۆ» جك قابىلدايدى. بولاشاقتا تاعى باسقا ەت كومبيناتتارىنىڭ دا بۇل ىسكە اتسالىسۋى جوسپارلانىپ وتىر», – دەدى بقو ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باسشىسى نۇرلان راحىمجانوۆ.

مامانداردىڭ ايتۋىنشا, كيىك پوپۋلياتسياسىنىڭ باقىلاۋسىز كوبەيۋى اۋىل شارۋاشىلىعى جەرلەرىنە ەلەۋلى زيان كەلتىرىپ, ەكوجۇيەدە تەڭگەرىمسىزدىككە اكەلۋى مۇمكىن. سوندىقتان كيىك سانىن رەتتەۋ جۇمىستارى قازاقستان رەسپۋبليكاسى ۇكىمەتىنىڭ ءتيىستى قاۋلىسىنا  سايكەس, بارلىق زاڭنامالىق جانە ەكولوگيالىق نورماعا ساي ىسكە اسىرىلماق.