قازاقستاندا كولىك پەن پاتەر ليزينگكە بەرىلۋى مۇمكىن

فوتو: اشىق دەرەككوز

ەلىمىزدە كولىك پەن پاتەر ليزينگكە بەرىلۋى مۇمكىن. ەندى قازاقستاندىقتار كولىك پەن پاتەردى ليزينگكە الا الادى. ءماجىلىس ءتيىستى زاڭدى قاراپ جاتىر,  دەپ حابارلايدى qandastar.kz

دەپۋتاتتاردىڭ ايتۋىنشا, زاڭ ەل ازاماتتارىن قارىزدان قۇتقارۋدى كوزدەيدى. ياعني, پايىزى كوپ اۆتونەسيەلەر مەن يپوتەكالىق باعدارلامالارعا بالاما بولۋعا ءتيىس. سەبەبى حالىقتىڭ بانكتەر الدىنداعى قارىزى ۇلعايىپ كەلەدى. ماسەلەن, بىلتىر يپوتەكالىق نەسيە 14%-عا ءوسىپ, 6,7 ترلن تەڭگەگە جەتتى. ال اۆتونەسيە سوماسى بىردەن 45%-عا ارتىپ, 3 ترلن تەڭگەدەن استى.

«زاڭ جوباسى ماقۇلدانسا, حالىقتىڭ قارىزى ازايادى», – دەيدى دەپۋتاتتار.

«قۇجات اياسىندا جەكە كاسىپكەر سانالمايتىن جەكە تۇلعالارعا ليزينگ ەنگىزۋ قاراستىرىلعان. بۇل ءوز كەزەگىندە ولارعا اۆتوكولىك جانە جىلجىمايتىن م ۇلىك سياقتى اكتيۆتەردى الۋعا مۇمكىندىك بەرەدى. اتالعان قۇجات قابىلدانعان جاعدايدا ازاماتتاردىڭ قارجى قىزمەتتەرىنە قول جەتكىزۋ مۇمكىندىگى ارتادى. ۇسىنىلعان تۇزەتۋلەر حالىقتىڭ شامادان تىس نەسيە الۋ دەڭگەيىن تومەندەتۋدى جانە ازاماتتاردىڭ ءال-اۋقاتىن ارتتىرۋدى كوزدەيدى. سونداي-اق بانك سەكتورىنىڭ جانە ليزينگتىك كومپانيالار نارىعىنىڭ باسەكەگە قابىلەتتىلىگىن دامىتۋعا باعىتتالعان», – دەدى ءماجىلىس دەپۋتاتى تاتيانا ساۆەلەۆا.

ليزينگتىڭ بىرنەشە ءتۇرى بار

ليزينگتىڭ بىرنەشە ءتۇرى بار. ءبىرىنشىسى, قارجىلىق ليزينگ. مۇندا ازامات كولىكتى جالعا الادى. ال كەلىسىم مەرزىمى اياقتالعاندا, كولىك ونىڭ يەلىگىنە وتەدى. ەكىنشىسى, وپەراتسيالىق ليزينگ. كولىك تەك جالعا بەرىلەدى. كەيىن ونى قايتارۋعا نەمەسە جاڭا مودەلگە اۋىستىرۋعا بولادى. ال ءۇشىنشىسى, قايتارىمدى ليزينگ دەپ اتالادى. بۇل جەردە كومپانيا ءوز كولىگىن ليزينگ بەرۋشىگە ساتادى. بىراق ونى جالعا الىپ قولدانادى.

ساراپشىلاردىڭ پايىمىنا سۇيەنسەك, نەسيەگە قاراعاندا ليزينگ ءتيىمدى.

– ءبىزدىڭ ەلدە اۆتونەسيەلەندىرۋ كەيدە 30 بەن 56%-عا دەيىن كوتەرىلىپ كەتەدى. ياعني, زاڭ بويىنشا ولاردىڭ سونداي مۇمكىندىكتەرى بار. ال ليزينگتە تىكەلەي ءونىمدى بەرگەندىكتەن, بۇل جەردەگى ەسەپتەۋلەر سول م ۇلىكتىڭ باعاسىمەن ەسەپتەلىنەدى. ال بىزدە كوبىنەسە حالىقتىڭ قالتاسىنىڭ كوتەرمەي جاتقاندىعى – جاڭاعى م ۇلىكتى ساتىپ العان باعا ەمەس, بانكتىڭ ۇسىنعان نەسيەلىك ستاۆكاسىنىڭ جوعارىلىعى. ال ليزينگتە نەسيەلىك سيستەمالار جۇزەگە اسپايدى, – دەيدى ەكونوميست باۋىرجان ىسقاق.

ليزينگ قىمباتشىلىق تۋدىرمايدى. ياعني, ليزينگتە باستاپقى جارنا تومەن بولادى نەمەسە مۇلدەم سۇرالمايدى. پايىزدىق ۇستەمەاقىسى نەسيەگە قاراعاندا ارزان. تولەم كەستەسى تاراپتاردىڭ مۇمكىندىگىنە قاراي قۇرىلادى. سونىمەن قاتار قوسىمشا كەپىلدىك قاجەت ەمەس.

قازىر ەلدە اۆتوكولىك زاڭدى تۇلعالارعا ليزينگكە بەرىلەدى. بۇل كاسىپورىنداردىڭ قىرۋار قارىزعا باتپاي-اق, اۆتوپاركتى جاڭارتۋىنا ءتيىمدى بولىپ وتىر.

– ال ليزينگ قۇرالى قىمباتشىلىققا اكەلەدى دەپ قاۋىپتەنۋدىڭ قاجەتى جوق. بارلىعى نارىقتاعى سۇرانىس پەن ۇسىنىستىڭ اراسىنداعى بايلانىسپەن تىكەلەي بايلانىستى, – دەيدى ەكونوميست.

ليزينگ مەحانيزمى امەريكا مەن ەۋروپادا بارىنشا دامىعان. ياعني, تۇرعىندار ەسكى كولىگىن تاپسىرىپ, جاڭاسىن ليزينگكە العاندى ءجون كورەدى.

24kz جازعانداي, قازىر ەلدە 6 ملن-عا جۋىق كولىك بار. بىراق ولاردىڭ 40%-دان استامىنىڭ شىققانىنا 20 جىلدان اسىپ كەتكەن. ال ليزينگ باعدارلاماسى وسى كولىك پاركىن جاڭارتۋدىڭ ءتيىمدى قۇرالىنا اينالۋعا ءتيىس.