قازاقستاندا كولىك سالىعىن تولەۋ مەرزىمى وزگەرتىلەدى

2020 جىلدان باستاپ كولىك سالىعى ءار جىلدىڭ ءساۋىر ايىنا دەيىن تولەنە باستاۋى مۇمكىن. بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا قر قارجى مينيسترلىگى مەملەكەتتىك كىرىستەر كوميتەتى سالىق سالۋ ءادىسناماسى دەپارتامەنتى ديرەكتورىنىڭ مىندەتىن اتقارۋشى داۋلەت جارىلعاسىنوۆ ءمالىم ەتتى, دەپ حابارلايدى قازاقپارات ءتىلشىسى.

«جەكە تۇلعالاردىڭ كولىك قۇرالدارى ءۇشىن سالىق تولەۋ مەرزىمىن اۋىستىرۋ ماسەلەسى پىسىقتالىپ جاتىر. اتاپ ايتقاندا, بۇل ەڭ الدىمەن, سالىقتىڭ ۋاقىتىلى ءتۇسىمىن قامتاماسىز ەتۋ ءۇشىن جاسالىپ جاتقان قادام. «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سالىق سالۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىمەن جەكە تۇلعالاردىڭ كولىك قۇرالدارىنا سالىناتىن سالىقتى تولەۋ مەرزىمىن 31 جەلتوقساننان 1 ساۋىرگە اۋىستىرۋ قاراستىرىلۋدا», — دەدى داۋلەت جارىلعاسىنوۆ.

دەپارتامەنت وكىلىنىڭ ايتۋىنا قاراعاندا, اتالمىش ۇسىنىس زاڭ نورمالارى كۇشىنە ەنگەننەن سوڭ كەلەسى جىلدان باستاپ قولدانىسقا ەنەدى. ال ءباسپاسوز ءماسليحاتىنان كەيىن تىلشىلەردىڭ سۇراعىنا جاۋاپ بەرگەن قر قم مكك سالىق سالۋ ءادىسناماسى دەپارتامەنتىنىڭ وندىرىستىك ەمەس تولەمدەر بويىنشا باسقارما باسشىسىنىڭ مىندەتىن اتقارۋشى دارحان بەيسەناليەۆ بۇل وزگەرىستىڭ نەلىكتەن ەنگىزىلىپ جاتقانىن ءتۇسىندىردى.

«جالپى, سالىق زاڭناماسىنا ساي, كولىك سالىعى ءار جىلدىڭ 31 جەلتوقسانىندا تولەنۋى كەرەك. كەلەسى جىلدان باستاپ ونى 1 ساۋىردەن باستاپ تولەتۋدى جوسپارلاپ وتىرمىز. نەلىكتەن? سەبەبى, ءبىز بيۋدجەتتىڭ ءتورتىنشى دەڭگەيىنە وتەمىز. ياعني, اۋىلدىڭ وكرۋگ اكىمدەرى كولىك سالىعىنان تۇسكەن اقشانى سول جىلى يگەرە الاتىنداي جاعداي جاساۋدى سۇراپ وتىر. وسى ماقساتتا تولەم قۇرىلىمىن وزگەرتىپ جاتىرمىز. ياعني, سالىق جىل سوڭىندا ەمەس, كەلەسى ەسەپتىك كەزەڭدە جىل باسىندا تۇسەدى», — دەدى ول.