قازاقستاندا كولىك جۇرگىزۋشىلەرى وزگە بىرەۋدىڭ قاتەلىگى ءۇشىن ايىپپۇل ارقالاپ جاتىر

فوتو: باق.كز

قازاقستاندىق كولىك جۇرگىزۋشىلەرى وزدەرى جاساماعان قۇقىقبۇزۋشىلىقتار ءۇشىن ايىپپۇل الىپ جاتقاندارىن ايتىپ شاعىمداندى. ساراپشىلاردىڭ پىكىرىنشە, بۇل – جول قوزعالىسىن باقىلاۋ كامەرالارىنىڭ كولىك نومىرلەرىن قاتە تانۋىنا بايلانىستى. مۇنداي جاعدايدا ايىپپۇلمەن كەلىسپەي, ونى جويۋعا بولادى, دەپ حابارلايدى qandastar.kz  31 ارناعا سىلتەمە جاساپ.

ايشا قوشەمان ەسىمدى جۇرگىزۋشىگە جىلدامدىقتى اسىردى دەگەن ايىپپەن ايىپپۇل جونىندە حابارلاما كەلگەن. الايدا ونىڭ ايتۋىنشا, سول كۇنى ول مۇلدە كولىك جۇرگىزبەگەن.

“سول كۇنى قالادان شىقپاعان سوڭ, eOtinish ارقىلى ءوتىنىش جازدىم. ايىپپۇلدى جويىپ بەردى, ەشتەڭە تولەمەدىم”, – دەيدى ول.

ايشا بۇل ماسەلەنى جىلدام ءارى قيىندىقسىز شەشە العان. بىراق مۇنداي جولى بولا بەرمەيتىندەر دە بار. كەيدە ادامدار جۇيكەسىن قۇرتىپ, ۋاقىتىن جوعالتىپ, ءمان-جايعا ۇڭىلمەستەن, كەلگەن ايىپپۇلدى بىردەن تولەي سالادى. ال كامەرالاردىڭ جۇمىس ىستەۋ جۇيەسى قاتەلىكتەن ادا ەمەس.

“ەلەكترونيكا تەك ناقتى سىزىقتار مەن تاڭبالاردى تانۋعا بەيىمدەلگەن. جارىقتىڭ شاعىلۋى نەمەسە باسقا فاكتورلار اسەر ەتكەن جاعدايدا, جۇيە كولىكتىڭ ماركاسىن دا ەلەمەيدى. ول ءنومىردى وقىپ, بەلگىلى ءبىر فورماتقا سايكەستەندىرىپ, كورىنگەن نارسەگە ايىپپۇل سالا سالادى”, – دەيدى “جالپى جول” قاۋىپسىز جول قوزعالىسى قاۋىمداستىعىنىڭ پرەزيدەنتى ارسەن شاكۋوۆ.

ال ىشكى ىستەر مينيسترلىگى مۇنداي جاعدايلاردا قاساقانا نيەت جوق ەكەنىن ايتىپ, بارلىق داۋلى ماسەلەلەر زاڭ شەڭبەرىندە شەشىلەتىنىن ەسكەرتەدى.