قازاقستاندا كريپتو-كارتا ىسكە قوسىلدى

2025 جىلدىڭ 3 ماۋسىمىندا الماتىدا وتكەن جيىندا ۇلتتىق بانك تسيفرلىق اكتيۆتەر يندۋسترياسىن دامىتۋعا باعىتتالعان جاڭا جوبالاردى تانىستىردى, دەپ حابارلايدى Qandastar.kz اقپارات پورتالى.

جيىن مەملەكەت باسشىسىنىڭ تاپسىرماسىنا سايكەس تسيفرلىق اكتيۆتەر يندۋسترياسىن ىلگەرىلەتۋ اياسىندا ۇيىمداستىرىلدى. ءىس-شاراعا بانكتەر, كريپتوبيرجالار مەن فينتەح-كومپانيالاردىڭ وكىلدەرى قاتىستى.

جيىن بارىسىندا «استانا» حالىقارالىق قارجى ورتالىعى (احقو) الاڭىندا ليتسەنزيالانعان كريپتوبيرجالاردىڭ ءامياندارىنا بايلانعان “كريپتو-كارتا” جوباسى ىسكە قوسىلدى. بۇل كارتالار ارقىلى تۇتىنۋشىلار قولما-قول اقشاسىز وپەراتسيالار ورىنداي الادى.

كريپتو-كارتا مەحانيزمى: كليەنت تولەم جاساعان ساتتە ونىڭ احقو كريپتونارىعىنداعى تسيفرلىق اكتيۆتەرى ساتىلىپ, سول ساتتە تولەم كارتاسىنا (بانك شوتىنا بايلانعان) ناقتى اقشا تۇسەدى. وپەراتسيا ءبىر مەزەتتە جۇزەگە اسادى جانە ەسەپ ايىرىسۋدىڭ جەدەلدىگى بانك پەن ليتسەنزيالانعان كريپتو-پروۆايدەر اراسىنداعى كريپتو-فياتتىق ينتەگراتسيا ارقىلى قامتاماسىز ەتىلەدى.

بۇل شەشىم تسيفرلىق اكتيۆتەردى قولدانىستاعى تولەم ينفراقۇرىلىمىنا قاۋىپسىز ءارى ىڭعايلى بىرىكتىرۋگە جول اشادى.

ۇلتتىق بانك بيىل تسيفرلىق اكتيۆتەر بويىنشا بىرقاتار پيلوتتىق جوبانى ىسكە اسىرۋدى جوسپارلاپ وتىر. ولاردىڭ قاتارىندا:

• ۇلتتىق ۆاليۋتامەن, سونىڭ ىشىندە تسيفرلىق تەڭگەمەن قامتىلعان ستەيبلكوينداردى شىعارۋ;
• قارجى اكتيۆتەرى مەن جىلجىمايتىن م ۇلىكتى توكەنيزاتسيالاۋ, باعالى قاعازدارعا تەڭەستىرىلگەن توكەندەر شىعارۋ;
• تسيفرلىق اكتيۆتەردىڭ قامتاماسىز ەتىلۋىن ەسەپكە الۋ جانە ساقتاۋ جۇيەلەرىن ۇيىمداستىرۋ;
• كريپتواكتيۆتەرمەن ايىرباستاۋ جانە ساقتاۋ سەرۆيستەرىن دامىتۋ;
• باسقا دا يننوۆاتسيالىق قارجى سەرۆيستەرى.

اتالعان باستامالاردى ىسكە اسىرۋ ءۇشىن ۇلتتىق بانك مۇددەلى مەملەكەتتىك ورگاندارمەن بىرلەسىپ, تسيفرلىق قارجى اكتيۆتەرىنە ارنالعان رەتتەۋشى بازانى قالىپتاستىرۋعا جانە كەپىلسىز اكتيۆتەردىڭ اينالىمىن كەڭەيتۋگە مۇمكىندىك بەرەتىن زاڭنامالىق تۇزەتۋلەر جوباسىن ازىرلەدى.