قازاقستاندا قۇرامىندا تىيىم سالىنعان بوياۋى بار شاي ءالى ساتىلىپ جاتىر

فوتو: depositphotos.com

بيىل جىل باسىندا قازاقستاندىقتار پاكىستاندىق شايدىڭ ساپاسىنا شاعىمدانعان ەدى. كەيىن ول ساراپتاماعا جىبەرىلىپ, قۇرامىنان تىيىم سالىنعان بوياۋىش تابىلعانى بەلگىلى بولدى.

الايدا بۇل شايلار ءالى ساتىلىپ جاتىر. Massaget.kz ءتىلشىسى بۇل ماسەلەنىڭ ءمان-جايىن انىقتاپ كوردى.

جەلىدە قازاقستاندىقتاردىڭ تىيىم سالىنسا دا دۇكەن سورەلەرىندە ساتىلىپ جاتقان پاكىستاندىق شايعا قاتىستى نارازىلىعى تارادى. شاي قايناعاندا تابيعي ەمەس اشىق تۇسكە بويالاتىنى, ونىڭ ۇستىنە شاي قۇرامىندا تۇسىنىكسىز تۇيىرشىكتەردى بايقاعان.

Zakon.kz باسىلىمىنىڭ مالىمەتىنشە, بۇل ماسەلەگە قاتىستى ساراپتاما ناۋرىزدا باستالعان. شاي قۇرامىنان تىيىم سالىنعان بوياۋىش تابىلعان. نەگىزى 2018 جىلى بۇل شايلاردى قازاقستانعا اكەلۋگە تىيىم سالىنعان. الايدا بىرنەشە ايدان كەيىن تىيىم الىپ تاستالعان.

جاقىندا «Al Barkat Classic Tea» جانە «Premium Gold Tea» شايلارىنىڭ قۇرامىندا قولدانۋعا تىيىم سالىنعان تارترازين ە102 جاساندى بوياعىش زاتى انىقتالعان.

بۇدان 3 جىل بۇرىن Total.kz اقپاراتتىق اگەنتتىگى تاۋەلسىز زەرتحاناداعى زەرتتەۋ ناتيجەلەرى تۇيىرشىكتەلگەن پاكىستاندىق قارا شايدىڭ «Al-Marua Premium», «ەمير چاي GOLD», «Al-Jannat GOLD», «Al-Hayat GOLD» جانە «وردا پاكيستان» دەپ اتالاتىن بىرنەشە ماركاسىندا ە102 جاساندى بوياعىش زاتىنىڭ بارىن انىقتاعان ەدى.

تىيىم سالىنعان بوياۋىش تۋرالى نە بەلگىلى?

تارترازين – سينتەتيكالىق جولمەن الىناتىن ەڭ ارزان بوياعىشتاردىڭ ءبىرى. E102 قوسپاسى نەگىزىنەن تاماق قوسپاسىنا قولدانىلادى, ويتكەنى ول تاماق ونىمدەرىن اشىق سارى تۇسكە بويايدى.

قۇزىرلى ورگان نە دەيدى?

Massaget.kz ءتىلشىسى بۇل ماسەلەنىڭ ءمان-جايىن انىقتاۋ ءۇشىن سانيتارلىق-ەپيدەميولوگيالىق باقىلاۋ كوميتەتىنە ساۋال جولدادى. الايدا شىلدەدە جىبەرىلگەن ساۋالعا ءالى ماردىمدى جاۋاپ قايتارىلمادى.

كوميتەت مالىمەتىنشە, شايعا جاسالعان ساراپتاما قورىتىندىسى ءالى دايىن بولماعان. ناۋرىزدا باستالعان ساراپتاما نەگە بىلاي ۇزاپ كەتكەنى بەيمالىم. ساراپتاما قورىتىندىسى ءمالىم بولمايىنشا تاۋار سورەلەردەن الىنبايدى. 

رەداكتسيا بۇل ماسەلەنى ءجىتى باقىلاۋىندا ۇستايدى.