Qazaqstanda quramynda tyıym salynǵan boıaýy bar shaı áli satylyp jatyr

Foto: depositphotos.com

Bıyl jyl basynda qazaqstandyqtar pákistandyq shaıdyń sapasyna shaǵymdanǵan edi. Keıin ol saraptamaǵa jiberilip, quramynan tyıym salynǵan boıaýysh tabylǵany belgili boldy.

Alaıda bul shaılar áli satylyp jatyr. Massaget.kz tilshisi bul máseleniń mán-jaıyn anyqtap kórdi.

Jelide qazaqstandyqtardyń tyıym salynsa da dúken sórelerinde satylyp jatqan pákistandyq shaıǵa qatysty narazylyǵy tarady. Shaı qaınaǵanda tabıǵı emes ashyq túske boıalatyny, onyń ústine shaı quramynda túsiniksiz túıirshikterdi baıqaǵan.

Zakon.kz basylymynyń málimetinshe, bul máselege qatysty saraptama naýryzda bastalǵan. Shaı quramynan tyıym salynǵan boıaýysh tabylǵan. Negizi 2018 jyly bul shaılardy Qazaqstanǵa ákelýge tyıym salynǵan. Alaıda birneshe aıdan keıin tyıym alyp tastalǵan.

Jaqynda «Al Barkat Classic Tea» jáne «Premium Gold Tea» shaılarynyń quramynda qoldanýǵa tyıym salynǵan tartrazın E102 jasandy boıaǵysh zaty anyqtalǵan.

Budan 3 jyl buryn Total.kz aqparattyq agenttigi táýelsiz zerthanadaǵy zertteý nátıjeleri túıirshiktelgen pákistandyq qara shaıdyń «Al-Marua Premium», «Emır chaı GOLD», «Al-Jannat GOLD», «Al-Hayat GOLD» jáne «Orda Pakıstan» dep atalatyn birneshe markasynda E102 jasandy boıaǵysh zatynyń baryn anyqtaǵan edi.

Tyıym salynǵan boıaýysh týraly ne belgili?

Tartrazın – sıntetıkalyq jolmen alynatyn eń arzan boıaǵyshtardyń biri. E102 qospasy negizinen tamaq qospasyna qoldanylady, óıtkeni ol tamaq ónimderin ashyq sary túske boıaıdy.

Quzyrly organ ne deıdi?

Massaget.kz tilshisi bul máseleniń mán-jaıyn anyqtaý úshin Sanıtarlyq-epıdemıologııalyq baqylaý komıtetine saýal joldady. Alaıda shildede jiberilgen saýalǵa áli mardymdy jaýap qaıtarylmady.

Komıtet málimetinshe, shaıǵa jasalǵan saraptama qorytyndysy áli daıyn bolmaǵan. Naýryzda bastalǵan saraptama nege bylaı uzap ketkeni beımálim. Saraptama qorytyndysy málim bolmaıynsha taýar sórelerden alynbaıdy. 

Redakııa bul máseleni jiti baqylaýynda ustaıdy.