جاڭالىقتار
قازاقستاندا قىركۇيەكتە قىزدارعا پاپيللوما ينفەكتسياسىنا قارسى ەگۋ باستالادى
فوتو: pro-medika.ru
بيىل كۇزدە وقۋشى قىزدارعا ادام پاپيللوما ۆيرۋسىنا (HPV) قارسى جوسپارلى ەكپە ەگۋ باستالادى. بۇل تۋرالى Stan.kz اقپارات اگەنتتىگى حابارلايدى.
«مەكتەپتەردە ەگۋ اتا-انالاردىڭ كەلىسىمىن العاننان كەيىن ەرىكتى تۇردە جۇرگىزىلەدى. اقش-تا وندىرىلگەن Merck Sharp & Dohme ۆاكتسيناسى قولدانىلادى», – دەدى استانا قالاسى بويىنشا سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى جاننا پراليەۆا.
ۇزاق مەرزىمدى يممۋنيتەتتى قالىپتاستىرۋ ءۇشىن قىزدار جىلىنا ەكى رەت ۆاكتسينا الادى. ۆاكتسينانىڭ ءوزى ءتورت ۆالەنتتى جانە HPV-نىڭ ءتورت جوعارى ونكوگەندى تۇرىنەن قورعايدى – 6, 11, 16, 18.
ساراپشىلاردىڭ ايتۋىنشا, بۇل ۆاكتسينا جاڭا ەمەس جانە 2006 جىلدان بەرى 135 ەلدە قولدانىلىپ كەلەدى: اۋستراليا, بەلگيا, ۇلىبريتانيا, گەرمانيا, شۆەيتساريا, دانيا, نورۆەگيا, اقش جانە تاعى باسقا. تمد ەلدەرىندە ارمەنيا, گرۋزيا, مولدوۆا, تۇركىمەنستان, قىرعىزستان جانە وزبەكستان ەلدەرىندە HPV-عا قارسى ەگۋ باعدارلاماسى جۇزەگە اسىرىلدى.
پاپيللوما ينفەكتسياسى – جاتىر موينى وبىرىنىڭ نەگىزگى سەبەپتەرىنىڭ ءبىرى. ول دۇنيەجۇزىندە ايەلدەر اراسىندا ءجيى كەزدەسەتىن ىسىكتەردىڭ ىشىندە ءتورتىنشى ورىندا. ال قازاقستاندا سۇت بەزى قاتەرلى ىسىگىنەن كەيىنگى ەكىنشى ورىندا.
ۆيرۋستىق ينفەكتسيانى بولدىرماۋدىڭ ەڭ سەنىمدى جولى – پاپيللوماعا قارسى ۋاقىتىندا ۆاكتسيناتسيالاۋ.
دارىگەرلەر HPV-گە قارسى ەگۋ ءۇشىن وڭتايلى جاس 9-14 ەكەنىن ايتادى. بۇل جاستا دەنەنىڭ يممۋندىق رەاكتسياسى ەڭ قولايلى, ال بالا, ادەتتە, ۆيرۋسپەن ءالى بايلانىستا بولعان جوق. ەرتە جاستا ۆاكتسينانى الۋ ارقىلى ادام قاتەرلى ىسىك تۋدىرۋى مۇمكىن جوعارى قاۋىپتى HPV تۇرلەرىنىڭ كوبىنەن قورعالعان.
«HPV شىرىشتى تەرى ارقىلى نەمەسە تەرىدەن تەرىگە بايلانىس ارقىلى بەرىلەدى. سونداي-اق ۆيرۋس انادان بالاعا تۋ كانالى ارقىلى ءوتۋ كەزىندە بەرىلەدى. ءوزىن-ءوزى جۇقتىرۋ ارقىلى, ياعني HPV ۇزاق ۋاقىت بويى تىرناق استىندا قالۋى مۇمكىن. سوندىقتان مەن اتا-انالاردى ۆاكتسيناتسياعا دەگەن كەرى كوزقاراسىن تاعى ءبىر رەت قايتا قاراۋعا شاقىرعىم كەلەدى. ويتكەنى بۇل ۆاكتسينا ءسىزدىڭ بالاڭىزدىڭ دەنساۋلىعى ءۇشىن ۇلتتىق پروفيلاكتيكالىق ەگۋ كۇنتىزبەسىنە سايكەس باسقا مىندەتتى ەگۋلەر سياقتى ماڭىزدى», – دەپ اتاپ ءوتتى پراليەۆا.
جاقىندا الەۋمەتتىك جەلىلەردە ەر ادامنىڭ «قىزدارعا ەكپە سالۋ بەدەۋلىككە اكەلەدى, ال ەكپەدەن باس تارتقاندارعا ايىپپۇل سالىنادى» دەگەن ۆيدەوسى پايدا بولدى. بۇل جونىندە سانيتارلىق-ەپيدەميولوگيالىق باقىلاۋ كوميتەتى مالىمدەمە جاسادى.
«الەۋمەتتىك جەلىلەردە جانە مەسسەندجەرلەردە HPV ۆاكتسيناتسياسىنىڭ بەدەۋلىككە اكەلەتىنى تۋرالى تاراعان اقپارات شىندىققا جاناسپايدى جانە جالعان دەپ تانىلدى», – دەلىنگەن حابارلامادا.
ەسكە سالايىق, بۇعان دەيىن ەلىمىزدە 11 جاسار قىزدارعا پاپيللوماۆيرۋسىنا قارسى قانداي ۆاكتسينا سالىناتىنى تۋرالى جازدىق. مينيسترلىكتىڭ مالىمەتىنشە, پرەپارات قازىردىڭ وزىندە ساتىپ الىنعان جانە جاقىن ارادا قازاقستانعا جەتكىزىلەدى.
