قازاقستاندا مانيكيۋر مەن پەديكيۋر باعاسى كۇرت ءوسىپ, رەكوردتىق كورسەتكىش تىركەلدى

فوتو: pixabay.com

2025 جىلدىڭ باسىنان بەرى قازاقستاندا مانيكيۋر مەن پەديكيۋر قىزمەتتەرى بۇرىن-سوڭدى بولماعان قىمباتتاۋدى كورسەتىپ وتىر, دەپ جازدى qandastar.kz

باعانىڭ ەڭ تەز ءوسۋى الماتىدا بايقالدى. بۇل تۋرالى Stan.kz اقپارات اگەنتتىگى DataHubارناسىنا سىلتەمە جاساپ حابارلايدى.

ءساۋىر ايىندا مانيكيۋردىڭ باعاسى ناۋرىزبەن سالىستىرعاندا 4,4%-عا قىمباتتاعان. بۇل, كەم دەگەندە, 2011 جىلدان بەرگى ەڭ جوعارى ايلىق ءوسىم بولىپ وتىر. ال پەديكيۋر ودان دا قارقىندى قىمباتتادى: ەلىمىز بويىنشا ءبىر ايدا بىردەن +8,2%. بۇل قىزمەت بويىنشا دەرەكتەر 2021 جىلدان بەرى جينالا باستادى. سوندىقتان قازىرگى ءوسىم – بۇكىل باقىلاۋ تاريحىنداعى ەڭ جوعارى كورسەتكىش.

ەكى قىزمەت ءتۇرى بويىنشا دا الماتىدا ەرەكشە سەكىرىس تىركەلدى. مانيكيۋر باعاسى ناۋرىزعا قاراعاندا 21,1%-عا, ال پەديكيۋر, ءتىپتى, 42,9%-عا ءوسىپ كەتتى. وسى ساۋىردەگى ءوسىم قالانىڭ جىلدىق ديناميكاسىن ايقىنداپ بەردى: مانيكيۋر +23,1%, پەديكيۋر +48%.

فوتو: DataHub

ايتا كەتەيىك, قازاقستان بويىنشا جالپى جىلدىق ءوسىم دە جوعارى. مىسالى, مانيكيۋر 19%-عا, پەديكيۋر 19,8%-عا قىمباتتاعان.

قىزىعى, ءدال وسى ۋاقىتتا مانيكيۋر مەن پەديكيۋرگە ارنالعان قۇرال-سايماندار يمپورتى ازايىپ بارادى. 2024 جىلدىڭ قورىتىندىسى بويىنشا يمپورت كولەمى توننامەن دە, دوللارمەن دە شامامەن ەكى ەسەگە قىسقارعان. ال 2025 جىلدىڭ العاشقى ەكى ايىندا فيزيكالىق كولەمى وتكەن جىلمەن سالىستىرعاندا 29%-عا, اقشالاي ەسەپتە 61%-عا تومەندەگەن.
ەسكە سالايىق, بۇعان دەيىن قازاقستاندىقتار الماتىدا جاڭادان قازىلعان كارتوپ باعاسىنىڭ قىمباتتاۋىنابايلانىستى الەۋمەتتىك جەلىدە نارازىلىقتارىن بىلدىرگەن ەدى. جاقىندا الەۋمەتتىك جەلىدە بويجەتكەن قازاقستاندىق سۋپەرماركەتتەردىڭ بىرىندە جاڭادان قازىلعان كارتوپ باعاسىنىڭ قىمباتتاعانىن ايتىپ, ۆيدەو جاريالادى. ونىڭ ايتۋىنشا, جاڭادان قازىلعان كارتوپتىڭ ءبىر كەلىسىنىڭ باعاسى 1 300 تەڭگەگە جۋىقتايدى. ول كارتوپتىڭ قۇنىن پومەلو مەن گرەيپفرۋت سياقتى جەمىستەرمەن سالىستىردى.