قازاقستاندا مىڭنان استام ەلدى مەكەندى سۋ باسۋ قاۋپى ءتونىپ تۇر

بيىل قازاقستانداعى 1223 ەلدى مەكەندى سۋ باسۋ قاۋپى بار, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.

توتەنشە جاعدايلار ءمينيسترى شىڭعىس ءارىنوۆتىڭ ايتۋىنشا, مينيسترلىك جەرگىلىكتى بيلىك وكىلدەرىمەن جانە مەملەكەتتىك ورگاندارمەن تىعىز بايلانىستا جۇمىس ىستەپ, ينفراقۇرىلىمدى تاسقىن سۋعا دايىنداۋ شارالارىن جۇرگىزۋدە.

ءارىنوۆ سەناتتاعى ۇكىمەت ساعاتىندا تاسقىن سۋدىڭ الدىن الۋ شارالارى تۋرالى بايانداما جاسادى.

«قازىرگى تاڭدا رەسپۋبليكا بويىنشا 1223 ەلدى مەكەندى سۋ باسۋ قاۋپى بار. مينيسترلىك ۇيلەستىرۋشى ورگان رەتىندە جەرگىلىكتى اتقارۋشى بيلىك وكىلدەرىمەن جانە مۇددەلى مەملەكەتتىك ورگاندارمەن بىرلەسە وتىرىپ, ينفراقۇرىلىمدى تاسقىنعا دايىنداۋ جۇمىستارىن اتقارۋدا», – دەدى مينيستر.

ونىڭ ايتۋىنشا, رەسپۋبليكالىق جانە وڭىرلىك باعدارلامالار اياسىندا كەلەسى الدىن الۋ شارالارى جۇزەگە اسىرىلىپ جاتىر:

— 576 شاقىرىم قورعانىس بوگەتتەرى مەن دامبالار سالىنىپ, نىعايتىلۋدا;

— 164 شاقىرىم درەناج جۇيەسى جاڭارتىلىپ, جوندەۋدەن وتكىزىلۋدە;

— جولداردىڭ استىنا 960 سۋ وتكىزۋ قۇرىلعىسى ورناتىلىپ, اۋىستىرىلۋدا;

— 658 شاقىرىم كانالدار مەن ارىقتار تازارتىلۋدا;

— 74 وزەندە 300 شاقىرىمعا جۋىق ارنانى تەرەڭدەتۋ جانە جاعالاۋدى بەكىتۋ جۇمىستارى جۇرگىزىلۋدە;

— قالالار مەن اۋىلداردا نوسەر جانە درەناج جۇيەلەرى سالىنىپ, جوندەلىپ جاتىر.

«بۇل شارالار سۋ تاسقىنى قاۋپىن ازايتىپ, ەلدى مەكەندەردى تابيعي اپاتتان قورعاۋعا كومەكتەسەدى», – دەپ مالىمدەدى ءارىنوۆ.