Qazaqstanda myńnan astam eldi mekendi sý basý qaýpi tónip tur

Bıyl Qazaqstandaǵy 1223 eldi mekendi sý basý qaýpi bar, dep habarlaıdy qandastar.kz Skifnews.kz aqparat portalyna silteme jasap.

Tótenshe jaǵdaılar mınıstri Shyńǵys Árinovtiń aıtýynsha, mınıstrlik jergilikti bılik ókilderimen jáne memlekettik organdarmen tyǵyz baılanysta jumys istep, ınfraqurylymdy tasqyn sýǵa daıyndaý sharalaryn júrgizýde.

Árinov senattaǵy úkimet saǵatynda tasqyn sýdyń aldyn alý sharalary týraly baıandama jasady.

«Qazirgi tańda respýblıka boıynsha 1223 eldi mekendi sý basý qaýpi bar. Mınıstrlik úılestirýshi organ retinde jergilikti atqarýshy bılik ókilderimen jáne múddeli memlekettik organdarmen birlese otyryp, ınfraqurylymdy tasqynǵa daıyndaý jumystaryn atqarýda», – dedi mınıstr.

Onyń aıtýynsha, respýblıkalyq jáne óńirlik baǵdarlamalar aıasynda kelesi aldyn alý sharalary júzege asyrylyp jatyr:

— 576 shaqyrym qorǵanys bógetteri men dambalar salynyp, nyǵaıtylýda;

— 164 shaqyrym drenaj júıesi jańartylyp, jóndeýden ótkizilýde;

— joldardyń astyna 960 sý ótkizý qurylǵysy ornatylyp, aýystyrylýda;

— 658 shaqyrym kanaldar men aryqtar tazartylýda;

— 74 ózende 300 shaqyrymǵa jýyq arnany tereńdetý jáne jaǵalaýdy bekitý jumystary júrgizilýde;

— qalalar men aýyldarda nóser jáne drenaj júıeleri salynyp, jóndelip jatyr.

«Bul sharalar sý tasqyny qaýpin azaıtyp, eldi mekenderdi tabıǵı apattan qorǵaýǵa kómektesedi», – dep málimdedi Árinov.