جاڭالىقتار
قازاقستاندا نەكەگە ماجبۇرلەپ, قىز الىپ قاشقاندار 10 جىلعا دەيىن سوتتالادى: زاڭ كۇشىنە ەندى
فوتو: جي
16 قىركۇيەكتەن باستاپ قىلمىستىق زاڭنامادا ازاماتتاردىڭ قۇقىقتارى مەن بوستاندىقتارىن قورعاۋدى كۇشەيتۋگە باعىتتالعان وزگەرىستەر كۇشىنە ەنەدى, دەپ جازادى qandastar.kz
بۇل تۋرالى Stan.kz اقپارات اگەنتتىگى حابارلايدى.
«قازاقستان رەسپۋبليكاسىنىڭ قىلمىستىق زاڭناماسىن وڭتايلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدا ادام ۇرلاۋ جانە نەكەگە ماجبۇرلەۋگە قاتىستى وزگەرىستەر قاراستىرىلعان.
ەندى قىلمىستىق كودەكستىڭ 125-بابىنداعى ەسكەرتپە الىپ تاستالادى. بۇعان دەيىن ۇرلانعان ادامدى ەرىكتى تۇردە جىبەرگەن ادام قىلمىستىق جاۋاپكەرشىلىكتەن بوساتىلۋى مۇمكىن ەدى. ەندى جابىرلەنۋشىنى ءوز ەركىمەن بوساتقان كۇننىڭ وزىندە كىنالى ادام زاڭعا سايكەس جاۋاپكەرشىلىككە تارتىلادى.
سونىمەن قاتار قىلمىستىق كودەكسكە جاڭا 125-1-بابى «نەكەگە ماجبۇرلەۋ» ەنگىزىلدى. ەندى بۇل ارەكەت قىلمىستىق قۇقىقبۇزۋشىلىق رەتىندە تانىلادى. نەكەگە ماجبۇرلەگەنى ءۇشىن ايىپپۇل, تۇزەۋ نەمەسە قوعامدىق جۇمىستار, باس بوستاندىعىن شەكتەۋ نەمەسە باس بوستاندىعىنان ايىرۋ تۇرىندەگى جازا قاراستىرىلعان.
“قىلمىستىڭ ءمان-جايىنا بايلانىستى 2000 ايلىق ەسەپتىك كورسەتكىشكە دەيىنگى مولشەردە ايىپپۇلدان باستاپ ەكى جىلعا دەيىنگى مەرزىمگە باس بوستاندىعىنان ايىرۋعا دەيىن جازا قاراستىرىلادى. ەگەر مۇنداي ارەكەت ابايسىزدا اۋىر زارداپتارعا اكەلسە, بەس جىلدان ون جىلعا دەيىن باس بوستاندىعىنان ايىرۋ جازاسى كوزدەلەدى. ال ەگەر ماجبۇرلەۋ زورلىق-زومبىلىقپەن, كامەلەتكە تولماعاندارعا قاتىستى, تاۋەلدىلىگىن پايدالانۋ ارقىلى, ادامدار توبىمەن نەمەسە قىزمەت بابىن پايدالانا وتىرىپ جاسالسا, بۇدان دا قاتاڭ جازا قاراستىرىلعان”, – دەلىنگەن حابارلامادا.
