جاڭالىقتار
قازاقستاندا وقىپ, شەتەلدىك ديپلوم الۋعا بولادى
تالاپكەرلەر ەلدە وقىپ تا, شەتەلدىك ديپلوم الا الادى. قازاقستاندا بيىل 8 شەتەلدىك جوعارى وقۋ ورنىنىڭ فيليالى اشىلادى,-دەپ حابارلايدى Qandastar.kz
بۇل تۋرالى عىلىم جانە جوعارى ءبىلىم ءمينيسترى مالىمدەدى. ساياسات نۇربەكتىڭ سوزىنشە, جۋىردا استانادا بريتاندىق Coventry ۋنيۆەرسيتەتىنىڭ, تۇركىستاندا كورەيلىك ۆۋسونگ ۋنيۆەرسيتەتىنىڭ كامپۋسى اشىلادى. بۇل ءبىلىم وردالارىن تامامداعان تۇلەكتەر شەتەلدىك ديپلوم العاندىقتان, بولاشاقتا اتالعان ەلدەردە جۇمىس ىستەي الادى. حەريوت-ۋوت 200 جىلدىق تاريحى بار تانىمال ۋنيۆەرسيتەتتەردىڭ ءبىرى. ول ينجەنەريا جانە IT ماماندىعى بويىنشا الەمدەگى ۇزدىك جوعارى وقۋ ورىندارىنىڭ قاتارىنا كىرەدى.
اتالعان ۋنيۆەرسيتەت دۋباي مەن مالايزيادا وقۋ كورپۋستارىن اشىپ, حالىقارالىق ىنتىماقتاستىق باعىتىنا بەت بۇرعان. بىلتىر العاش رەت ورتالىق ازيا وڭىرىندە ياعني ەلىمىزدە دە اشىلدى.
بۇل فيليال قۇدايبەرگەن جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ بازاسىندا جۇزەگە استى. قازىر ءبىلىم ورداسىندا 300 ستۋدەنت وقىپ جاتىر. كوركەماي ەلەۋسىز, ستۋدەنت: – ەگەر اعىلشىن تىلىنەن بازاڭىز بولعان جاعدايدا, نەگىزىندە, وڭاي. كەيبىر جاڭا تاقىرىپتار بولادى, اعىلشىن تىلىندە تەرميندەر كەي كەزدە قابىلداۋ قيىن بولىپ جاتادى.
مۇنداي كەزدە بىلىكتى مۇعالىمدەرىمىزدەن سۇرايمىز. وقۋ اسا قاتتى قيىن دەپ ايتا المايمىن. ءيا, مۇندا ستۋدەنتتەر 3 ءبىلىم باعدارلاماسى بويىنشا بىلىكتىلىكتەرىن جەتىلدىرۋدە. ولار كومپيۋتەر ينجەنەرياسى, ەلەكتر ەنەرگەتيكاسى جانە مۇناي ينجەنەرياسى مەن ەنەرگومەنەدجمەنتى.
سونداي-اق ءبىلىم الۋشىلار الداعى ۋاقىتتا Heriot-Watt ۋنيۆەرسيتەتىنىڭ باسقا دا فيليالدارىندا بىلىمدەرىن جالعاستىرا الادى. مۇقاعالي قالانباي, Heriot-watt اقتوبە كامپۋسىنىڭ اعا وقىتۋشىسى: – ەگەر اعىلشىن ءتىلىن ءبىلىپ كەلسە, ۇبت-دان جاقسى ۇپاي الىپ كەلسە, وسىندا وقۋعا ءتۇسىپ, ءبىلىمىن جالعاستىرا الادى. ءبىلىم دەڭگەيلەرىنە ءتانتىمىن. قازاقستانداعى جاس بالالاردىڭ ءبىلىمى وتە جوعارى. بۇلاردىڭ بولاشاعى جاقسى, كەرەمەت دەپ ايتا الامىن. سەبەبى وسىندا تۇسكەن بالالار ەكى ديپلوم الىپ شىعادى. ولاردىڭ ءبىرى – حەريوتتىڭ ديپلومى, ەكىنشىسى – جۇبانوۆتىڭ ديپلومى. حەريوتتىڭ ديپلومىن العان بالالار الەمدىك دەڭگەيدەگى ديپلوممەن بىردەي بولادى. ەلدىڭ بارلىق جوعارى وقۋ ورىندارىنداعى قابىلداۋ كوميسسيالارى جۇمىستارىن باستادى. اقتوبەدەگى جۇبانوۆ ۋنيۆەرسيتەتىنىڭ بازاسىندا ورنالاسقان حەريوت ۋوت كامپۋسى دا تالاپكەرلەرگە ەسىگىن اشتى. بىلتىر العاشقى تۇلەكتەرىن قابىلداعان وقۋ ورنىنا بيىل قىزىعۋشىلىق وتە جوعارى.
ەلدىڭ شالعاي جاتقان وڭىرلەرىنەن بولەك رەسەيدىڭ دە تۇلەكتەرى مويىن بۇرۋدا. لاۋرا قاراباسوۆا, ق. جۇبانوۆ اتىنداعى اقتوبە مەملەكەتتىك وڭىرلىك ۋنيۆەرسيتەتىنىڭ رەكتورى: – ءبىرىنشى كۇنى عانا ەڭ العاشقى ءبىزدىڭ حالىقارالىق شەتەلدىك ستۋدەنتىمىز كەلىپ, ءوز قۇجاتىن تاپسىردى. ءبىر ەرەكشەلىگى ول كورشىلەس رەسەيدىڭ ازاماتى.
وقۋ ۇلگەرىمىنە قاراساق, سەرتيفيكاتتارىنداعى پاندىك باعالارى وتە جوعارى. اعىلشىن ءتىلىنىڭ ءبىلۋ دەڭگەيى 7,5 دەگەن باعانى كورسەتىپ وتىر. بۇل – اقىلى وقۋعا قۇجات تاپسىرعان العاشقى تالاپكەرىمىز. مەملەكەت باسشىسى قاسىم-جومارت توقاەۆ 2022 جىلى ەلىمىزدە ۇزدىك شەتەلدىك جوعارى وقۋ ورىندارىنىڭ فيليالدارىن اشۋدى تاپسىرعان بولاتىن. قازىرگە دەيىن 14 بولىمشە اشىلدى.
ەندى تاعى 8 شەتەلدىك جوعارى وقۋ ورىندارىنىڭ فيليالى اشىلادى. ياعني م.دۋلاتي اتىنداعى تاراز وڭىرلىك ۋنيۆەرسيتەتى بازاسىندا مەندەلەەۆ اتىنداعى رەسەي حيميا-تەحنولوگيالىق ۋنيۆەرسيتەتىنىڭ, وڭتۇستىك قازاقستان پەداگوگيكالىق ۋنيۆەرسيتەتى بازاسىندا تۇركيالىق گازي ۋنيۆەرسيتەتىنىڭ, استانا حالىقارالىق ۋنيۆەرسيتەتى بازاسىندا بەيجىڭ تىلدەر جانە مادەنيەت ۋنيۆەرسيتەتىنىڭ جانە نارحوز ۋنيۆەرسيتەتى جانىنان يرلانديالىق كۆينس ۋنيۆەرسيتەتىنىڭ فيليالى اشىلادى. سونداي-اق وڭتۇستىك كورەيايالىق كايست جانە ۆۋسونگ ۋنيۆەرسيتەتتەرىمەن دە كەلىسسوز جۇرگىزىلىپ جاتىر.
