Qazaqstanda oqyp, sheteldik dıplom alýǵa bolady

Talapkerler elde oqyp ta, sheteldik dıplom ala alady. Qazaqstanda bıyl 8 sheteldik joǵary oqý ornynyń fılıaly ashylady,-dep habarlaıdy Qandastar.kz

Bul týraly Ǵylym jáne joǵary bilim mınıstri málimdedi. Saıasat Nurbektiń sózinshe, jýyrda Astanada brıtandyq Coventry ýnıversıtetiniń, Túrkistanda koreılik Výsong ýnıversıtetiniń kampýsy ashylady. Bul bilim ordalaryn támamdaǵan túlekter sheteldik dıplom alǵandyqtan, bolashaqta atalǵan elderde jumys isteı alady. Herıot-Ýot 200 jyldyq tarıhy bar tanymal ýnıversıtetterdiń biri. Ol Injenerııa jáne IT mamandyǵy boıynsha álemdegi úzdik joǵary oqý oryndarynyń qataryna kiredi.

Atalǵan ýnıversıtet Dýbaı men Malaızııada oqý korpýstaryn ashyp, halyqaralyq yntymaqtastyq baǵytyna bet burǵan. Byltyr alǵash ret Ortalyq Azııa óńirinde ıaǵnı elimizde de ashyldy.

Bul fılıal Qudaıbergen Jubanov atyndaǵy Aqtóbe óńirlik ýnıversıtetiniń bazasynda júzege asty. Qazir bilim ordasynda 300 stýdent oqyp jatyr.  Kórkemaı Eleýsiz, stýdent: – Eger aǵylshyn tilinen bazańyz bolǵan jaǵdaıda, negizinde, ońaı. Keıbir jańa taqyryptar bolady, aǵylshyn tilinde termınder keı kezde qabyldaý qıyn bolyp jatady.

Mundaı kezde bilikti muǵalimderimizden suraımyz. Oqý asa qatty qıyn dep aıta almaımyn. Iá, munda stýdentter 3 bilim baǵdarlamasy boıynsha biliktilikterin jetildirýde. Olar kompıýter ınjenerııasy, elektr energetıkasy jáne munaı ınjenerııasy men energomenedjmenti.

Sondaı-aq bilim alýshylar aldaǵy ýaqytta Heriot-Watt ýnıversıtetiniń basqa da fılıaldarynda bilimderin jalǵastyra alady. Muqaǵalı Qalanbaı, Heriot-watt Aqtóbe kampýsynyń aǵa oqytýshysy: – Eger aǵylshyn tilin bilip kelse, UBT-dan jaqsy upaı alyp kelse, osynda oqýǵa túsip, bilimin jalǵastyra alady. Bilim deńgeılerine tántimin. Qazaqstandaǵy jas balalardyń bilimi óte joǵary. Bulardyń bolashaǵy jaqsy, keremet dep aıta alamyn. Sebebi osynda túsken balalar eki dıplom alyp shyǵady. Olardyń biri – Herıottyń dıplomy, ekinshisi – Jubanovtyń dıplomy. Herıottyń dıplomyn alǵan balalar álemdik deńgeıdegi dıplommen birdeı bolady. Eldiń barlyq joǵary oqý oryndaryndaǵy qabyldaý komıssııalary jumystaryn bastady. Aqtóbedegi Jubanov ýnıversıtetiniń bazasynda ornalasqan Herıot ýot kampýsy da talapkerlerge esigin ashty. Byltyr alǵashqy túlekterin qabyldaǵan oqý ornyna bıyl qyzyǵýshylyq óte joǵary.

Eldiń shalǵaı jatqan óńirlerinen bólek Reseıdiń de túlekteri moıyn burýda. Laýra Qarabasova, Q. Jubanov atyndaǵy Aqtóbe memlekettik óńirlik ýnıversıtetiniń rektory: – Birinshi kúni ǵana eń alǵashqy bizdiń halyqaralyq sheteldik stýdentimiz kelip, óz qujatyn tapsyrdy. Bir ereksheligi ol kórshiles Reseıdiń azamaty.

Oqý úlgerimine qarasaq, sertıfıkattaryndaǵy pándik baǵalary óte joǵary. Aǵylshyn tiliniń bilý deńgeıi 7,5 degen baǵany kórsetip otyr. Bul – aqyly oqýǵa qujat tapsyrǵan alǵashqy talapkerimiz. Memleket basshysy Qasym-Jomart Toqaev 2022 jyly elimizde úzdik sheteldik joǵary oqý oryndarynyń fılıaldaryn ashýdy tapsyrǵan bolatyn. Qazirge deıin 14 bólimshe ashyldy.

Endi taǵy 8 sheteldik joǵary oqý oryndarynyń fılıaly ashylady. Iaǵnı M.Dýlatı atyndaǵy Taraz óńirlik ýnıversıteti bazasynda Mendeleev atyndaǵy Reseı hımııa-tehnologııalyq ýnıversıtetiniń, Ońtústik Qazaqstan pedagogıkalyq ýnıversıteti bazasynda túrkııalyq Gazı ýnıversıtetiniń, Astana Halyqaralyq ýnıversıteti bazasynda Beıjiń tilder jáne mádenıet ýnıversıtetiniń jáne Narhoz ýnıversıteti janynan ırlandııalyq Kvıns ýnıversıtetiniń fılıaly ashylady. Sondaı-aq Ońtústik Koreıaıalyq KAIST jáne Výsong ýnıversıtetterimen de kelissóz júrgizilip jatyr.