قازاقستاندا ورتاشا جالاقى 403 251 تەڭگەگە جەتتى. ەلىمىزدە ەڭ جوعارى جانە تومەن جالاقىنى كىمدەر الادى?

فوتو: اشىق دەرەككوز

قازاقستانداعى ورتاشا جالاقى 400 مىڭنان استى. بۇگىندە ەلدەگى ورتاشا ايلىق كورسەتكىشى 403 251 تەڭگەنى قۇراپ وتىر. ۇلتتىق ستاتيستيكا بيۋروسى وسىنداي مالىمەت كەلتىردى. ال ەڭ جوعارى جانە تومەن جالاقىنى قاي مامان يەلەرى الادى? kursiv.media دەرەكتەر ۇسىندى.

بيۋرونىڭ 2024 جىلعى ەكىنشى توقسانداعى ەسەبىنە سايكەس, كاسىپكەرلىك قىزمەتپەن اينالىساتىن شاعىن كاسىپورىنداردا جۇمىس ىستەيتىندەردى قوسپاعاندا, قازاقستاندا جالدامالى قىزمەتكەرلەردىڭ جالاقى قورى ءۇش ايدا 4,6 ترلن تەڭگەنى قۇراعان.

بۇگىندە جالدامالى قىزمەتتەگىلەردىڭ ناقتى سانى 3,8 ميلليونعا جۋىقتاپ وتىر. وسىلايشا, ءبىر قىزمەتكەردىڭ ورتاشا ايلىق نومينالدى جالاقىسى 403 251 تەڭگە مولشەرىندە بولىپ وتىر. ال جالاقىنىڭ مەدياندىق ءمانى 278 296 تەڭگەنى قۇرايدى.

قازاقستاندا ەڭ جوعارى جالاقىنى كىمدەر الادى?

قاي سالا ماماندارى ەڭ كوپ جالاقى الادى دەگەنگە توقتالساق. بيىلعى جىلدىڭ ەكىنشى توقسانىنداعى كورسەتكىشكە سەنسەك, ەڭ جوعارى جالاقىنى قارجى جانە ساقتاندىرۋ قىزمەتى سالاسىنىڭ ماماندارى الىپ وتىر. بۇل سالا قىزمەتكەرلەرىنىڭ ايلىق جالاقىسى 878 739 تەڭگە كولەمىندە. ودان كەيىنگى ورىندا اقپارات جانە بايلانىس سالاسىنىڭ قىزمەتكەرلەرى. بۇل باعىتتا جۇمىس ىستەيتىن ماماندار 661 339 تەڭگە توڭىرەگىندە جالاقى الادى. كاسىبي, عىلىمي جانە تەحنيكالىق قىزمەتتەگىلەرگە 549 673 تەڭگە شاماسىندا ايلىق تولەنىپ وتىر. ەڭ تومەنگى ورتاشا جالاقى اۋىل, ورمان جانە بالىق شارۋاشىلىعىنداعى قىزمەتكەرلەرگە تيەسىلى, ولار – 251 301 تەڭگەنى مىسە تۇتۋعا ءماجبۇر.

«2023 جىلعى ءتيىستى توقسانمەن سالىستىرعاندا, ورتاشا ايلىق جالاقىنىڭ ەڭ جوعارعى ءوسىمى قارجى جانە ساقتاندىرۋ قىزمەتى – 23,3%, ونەر, ويىن-ساۋىق جانە دەمالىس – 21,5% جىلجىمايتىن م ۇلىكپەن وپەراتسيالار – 21,1% سالالارىندا بايقالدى. ءبىلىم بەرۋدە ورتاشا ايلىق جالاقى 7,2%-عا, دەنساۋلىق ساقتاۋ جانە حالىققا الەۋمەتتىك قىزمەت كورسەتۋدە 5,6%-عا ءوستى», – دەپ حابارلادى ۇلتتىق ستاتيستيكا بيۋروسى.

جالاقى مولشەرى تومەندەگەن سالالار

دەي تۇرعانمەن, ەلدەگى ينفلياتسيانى ەسكەرسەك, ناقتى ماندەگى جالاقى كولەمى بىلتىرعى ءتيىستى توقسانمەن سالىستىرعاندا بەس سالادا, كەرىسىنشە, تومەندەگەن. اتاپ ايتقاندا, اكىمشىلىك جانە قوسالقى قىزمەت كورسەتۋدە – 8,7%, مەملەكەتتىك باسقارۋ جانە قورعانىستا – 3%, دەنساۋلىق ساقتاۋدا – 2,7%, ءبىلىم بەرۋدە – 1,2%, تۇرۋ جانە تاماقتانۋ بويىنشا قىزمەت كورسەتۋ – 0,4%-عا دەيىن تومەندەۋى بايقالادى.

وڭىرلىك بولىنىسكە توقتالار بولساق. بىلتىرعى جىلدىڭ وسىنداي كەزەڭىمەن سالىستىرعاندا 2024 جىلدىڭ II توقسانىندا ورتاشا ايلىق اتاۋلى جالاقىنىڭ ەڭ كوپ ءوسۋى الماتى قالاسىندا بايقالادى. ەلىمىزدەگى ەڭ ءىرى مەگاپوليستە جالاقى – 14,3%-عا وسكەن.  ودان كەيىنگى ورىندا 14%-دىق وسىممەن اقتوبە وبلىسى, ۇشتىكتى 12,9%-بەن پاۆلودار وبلىسى تۇيىندەيدى.

ايتا كەتەيىك, ەڭبەك جانە حالىقتى الەۋمەتتىك قورعاۋ مينيسترلىگى قازاقستانداعى ەڭ تومەنگى جالاقىنى ەسەپتەۋدىڭ حالىقارالىق ستاندارتتارىن بەكىتپەك. سول ماقساتتا دامۋشى ەلدەردى ەرەكشە ەسكەرە وتىرىپ, ەڭ تومەنگى جالاقى تۋرالى كونۆەنتسيانى راتيفيكاتسيالاۋ تۋرالى زاڭ جوباسى ازىرلەنىپ, ءماجىلىس قاراۋىنا ۇسىنىلماق.

جۋىردا الماتىنىڭ ەكونوميكا باسقارماسى ەلدەگى ەڭ ءىرى مەگاپوليس تۇرىندارىنىڭ ورتاشا ايلىق جالاقىسى مولشەرىن جاريالاعان بولاتىن.