«Qazaqstanda óziniń deńgeıinde jalaqy ala almaı júrgen muǵalimder bar» – Aıatjan Ahmetjanuly

Foto: deke qorynan

Belgili ustaz, Qazbilim jobasynyń avtory Aıatjan Ahmetjan qazirgi qoǵamda muǵalimderdiń mártebesi qandaı ekenin aıtty, dep habarlaıdy  qandastar.kz Alash.KZ-ke silteme jasap.

«Kez kelgen dúnıe salystyrmaly ǵoı. Damyǵan, bilimge qatty mán beretin memleketterge qaraǵanda tómen. 2017 jyldarǵa deıingi muǵalim mártebesinen áldeqaıda jaqsy, ıaǵnı ilgerileý bar. Qazir muǵalimdik birshama suranys týdyratyn mamandyq. Muǵalim bolý burynǵydaı qadirsiz mamandyq emes. Ekinshiden, eger muǵalim ózi saýatty bolsa, onda olardyń quqyǵy da 2017-2018 jyldarǵa deıingideı buzylmaıdy. Úshinshiden, saýatty muǵalimder óte joǵary deńgeıdegi suranysqa ıe», – dedi Aıatjan Ahmetjan  inbusiness.kzredakııa tilshisiniń saýalyna bergen jaýabynda.

Bilim salasynyń belgili sarapshysy muǵalimder men mektep basshylary qandaı bolýy kerek ekenine de pikir bildirdi.

«Mektep dırektorlary eń aldymen naǵyz pedagog bolýy kerek. Iaǵnı, mekteptiń bas pedagogy retinde ustaz dep ataıtyndaı tulǵa, kóshbasshy bolýy tıis. Muǵalimder eń áýeli kásibı bilikti bolýy kerek, óziniń mamandyǵyn, pánin jetik meńgergeni jón. Sonymen qatar, ol sheksiz izdenimpaz bolǵany durys. Adam tárbıeleýshiniń qoǵam úzdiksiz ózgerip bara jatqan tusta bir orynda qalyp qoıýyna bolmaıdy. Úshinshiden, muǵalim ol mamandyq emes, óner. Men muny únemi aıtamyn. Ol ózgeniń balasynyń janyn túsinetin, jaqsy kóretin, óz mamandyǵyn sheksiz súıetin adam bolýy kerek dep oılaımyn», – dep atap ótti ol.

Tárbıege jaýapty kim?

«Tárbıege myna adam jaýapty degenge qarsymyn. Tárbıege bárimiz jaýaptymyz. Tipti mektepte júrmegen siz de jaýaptysyz. Men de jaýaptymyn. Úıinde júrgen ata-ana da jaýapty. Biz bárimiz tárbıege jaýaptymyz jáne árbir is-qımylymyzben bala tárbıeleýshi ekenimizdi oılaǵan jaǵdaıda ǵana tárbıe salasy ońalady. Tárbıe mynaniki dep jeke bireýge menshiktep bersek, eshqashan ońalmaıdy. Kez kelgen qoǵamnyń múshesi – tárbıege jaýapty tulǵa», – dedi Aıatjan Ahmetjan.

Osyǵan deıin Májilis depýtaty Ashat Aımaǵambetov kezinde UBT-dan eń tómen ball alǵandar muǵalimdikke baratynyn, qazir jaǵdaı túbegeıli ózgergenin aıtqan.

Aıatjan Ahmetjan depýtattyń pikirimen kelisti. Ol búgingi tańda testileýden eń joǵary ball alǵandar muǵalimdikti tańdaıtynyn jetkizdi. Sózinshe, qazir muǵalimdik – suranysqa ıe, birshama bedeldi mamandyq. Qazir muǵalim bolýǵa asyǵatyn jas túlekter kóp, dep atap ótti spıker.

Qazaqstan muǵalimderi laıyqty jalaqy alyp júr me?

Jalpy elimizde sońǵy tórt jylda ustazdardyń jalaqysy eki ese artqan. Budan basqa biliktilik sanattary boıynsha qosymsha qarjy alatyn muǵalimder de bar.

«Alarmanǵa altaý az, berermenge beseý kóp» deıdi ǵoı. Muǵalim óziniń biliktiligine saı jalaqy alýy kerek. Qazaqstanda óziniń deńgeıinde jalaqy ala almaı júrgen muǵalimder bar jáne óziniń deńgeıinen artyq jalaqy alyp júrgen muǵalimder bar. Mysaly, myqty, álemdik deńgeıdegi shákirtterdi tárbıelegen, kez kelgen balanyń juldyzyn jaǵa alatyn muǵalimge qazirgi jalaqy az. О́z pánin bilmeıtin, oqýshyǵa jetkize almaıtyn, mektepte tek qana nápaqa úshin júrgen muǵalimge qazirgi jalaqy kóp», – dedi belgili ustaz.

Aıatjan Ahmetjan qazirgi zaman muǵalimderinde múmkindik áldeqaıda kóp ekenin jasyrmady.

«Qazaq qoǵamy ustaz degen kezde ult ustazy – Ahmet Baıtursynovty, Ybyraı Altynsarındi eske túsiredi. Olar qıyn kezeńde, eshteńe bolmaǵan ýaqytta qazaq balasynyń bolashaǵy úshin janyn berip, eńbek etti ári qanshama urpaqtyń juldyzyn jaqty, bir ulttyń bolashaǵyn qalyptastyrdy. Dál qazirgi ustazdardan da sondaı bıik deńgeıdegi jumys kútemin. Qazirgi muǵalimderdiń múmkindigi áldeqaıda joǵary. Dál osy kezde ultty súıetin, ulttyń bolashaǵy úshin eńbek ete alatyn urpaq tárbıeleýimiz kerek», – dedi spıker.