قازاقستاندا ستالكەرلەر قىلمىستىق جازاعا تارتىلۋى مۇمكىن

فوتو: اشىق دەرەككوز

قازاقستاندا قىلمىستىق كودەكسكە «ستالكينگ» ۇعىمىن ەنگىزۋ تالقىلانىپ جاتىر. بۇل تۋرالى ءماجىلىس دەپۋتاتى ابزال قۇسپان ايتتى, دەپ جازدى qandastar.kz

دەپۋتاتتىڭ سوزىنە قۇلاق تۇرسەك, «ستالكينگ» تەرمينىن قازاقشاعا اۋدارۋ قاراستىرىلماعان. ويتكەنى بۇل ۇعىم الەمدىك دەڭگەيدە كەڭىنەن قولدانىلادى جانە حالىقارالىق تاجىريبەدە وسى اتاۋ ساقتالادى.

ونىڭ ايتۋىنشا, ستالكەرلەر باستاپقى كەزدە ايىپپۇل تولەيدى. ال ەگەر ول ارەكەتىن قايتالاسا, جازاسى اۋىر بولۋى مۇمكىن.

«بۇل نورمانىڭ نەگىزگى ماقساتى – ازاماتتاردى بىردەن سوتتاپ, تۇرمەگە وتىرعىزۋ ەمەس, اۋىر جانە اسا اۋىر قىلمىستاردىڭ الدىن الۋ. ءبىز گەرمانيا مەن كانادانىڭ تاجىريبەسىن زەردەلەدىك. كانادادا ستالكينگ اۋىر قىلمىس ساناتىنا جاتادى. بىراق ءبىز بۇل نورمانى بىردەن اۋىر قىلمىستار قاتارىنا قوسپايمىز. ۋاقىت وتە كەلە تەرگەۋ جانە سوت تاجىريبەسى نەگىزىندە, ەگەر قايتالانۋ جاعدايلارى جيىلەسە, ونى اۋىرلاتىلعان ساناتقا اۋىستىرۋ ماسەلەسىن قاراستىرۋىمىز مۇمكىن», – دەدى ابزال قۇسپان.

جاڭا نورما قىلمىستىق تەرىس قىلىق رەتىندە ەنگىزىلۋى مۇمكىن. ازىرگە «قىلمىستىڭ قايتالانۋى نەمەسە باسقا اۋىر قۇقىقبۇزۋشىلىققا ۇلاسۋى مۇمكىن بە?» دەگەن سۇراق تالقىلانۋدا.